Қозоғистон ва Ўзбекистон фуқароларининг ўзаро саёҳатига қўйиладиган талаблар енгиллаштирилади
ASTANA. Kazinform – Бугун ҚР Парламенти Сенатининг ялпи мажлисида “2000 йил 7 июлдаги Қозоғистон Ҳукумати ва Ўзбекистон Ҳукумати ўртасида фуқароларнинг ўзаро ташрифлари шартлари тўғрисидаги битимга ўзгартиришлар киритиш тўғрисида”ги баённомани ратификация қилиш ҳақида”ги Қонун қабул қилинди.
Ушбу Баённома ҚР Президентининг 2022 йил 22 декабрь куни Тошкентга ташрифи чоғида имзоланган. Ўзбекистон мазкур протоколни ўтган йилнинг апрель ойида ратификация қилган эди. Қонуннинг мақсади икки давлат ўртасидаги дўстона муносабатларни янада ривожлантириш, фуқароларнинг саёҳатларини тартибга солиш, бир давлат фуқароларининг бошқа давлат ҳудудида бўлишлари учун қулай шарт-шароитлар яратишнинг ҳуқуқий асосларини янада такомиллаштиришдан иборат.
“Баённомада Битимнинг бир қатор моддаларининг алоҳида бандлари, Битимнинг иловалари янги таҳрирда ёзилган, айрим моддалар эса олиб ташланди. Улар орасида асосий ўзгаришлар Битим томонлари фуқароларининг кириши ва бўлиш муддатини тартибга солувчи 2-моддага киритилган. Амалдаги 2-моддага кўра, ҳар икки давлат фуқаролари бошқа Томон ҳудудига 5 кунгача рўйхатдан ўтмасдан киришлари ва бўлишлари мумкин. Баённомага кўра, фуқароларнинг бўлиш муддати давлат чегарасини кесиб ўтган пайтдан бошлаб 30 календар кунидан ошмаса, уларнинг ўз ҳудудларида ваколатли органларда рўйхатдан ўтмасдан бўлишининг такомиллаштирилган тартиби жорий этилади. Шундай қилиб, Баённомада фуқароларнинг иккинчи тараф давлати ҳудудида вақтинчалик рўйхатдан ўтмасдан бўлиш муддати 5 кундан 30 кунга оширилади”, – деди сенатор Қайрат Тастекеев.
Баённомада кўриб чиқилаётган навбатдаги ўзгартириш Томонлар (Қозоғистон ва Ўзбекистон) фуқароларига бошқа Томон давлати ҳудудига келганида чегара хизматларини кўрсатувчи ва жўнаб кетгандан кейин қайтарилиши шарт бўлган миграция назорати карточкалари билан боғлиқ нормаларни олиб ташлашдир.
Ўз навбатида, Сенат раиси Маулен Ашимбаев Қозоғистон ва Ўзбекистон ўртасида мустаҳкам қардошлик муносабатлари ўрнатилганини таъкидлади.
“Давлатлар томонидан имзоланган Абадий дўстлик ва иттифоқчилик шартномалари бунинг ёрқин далилидир. Бугун кўриб чиқилган баённома икки давлат фуқароларининг ўзаро ташрифлари чоғида қўшимча мақбул ҳуқуқий вазиятни белгилаб беради. Маъқулланган қонун дўстона қўшничилик муносабатларини янада мустаҳкамлашга хизмат қилади, деб ҳисоблаймиз”, – деди Сенат раиси.
