Қозоғистон ва Туркия илмий ҳамкорликни кучайтиради – Сенат
ASTANA. Kazinform – Бугун ҚР Парламенти Сенатининг ялпи мажлисида “Қозоғистон Ҳукумати ва Туркия Ҳукумати ўртасида ўсимликлар карантини ва уларни муҳофаза қилиш соҳасидаги ҳамкорлик тўғрисидаги битимни ратификация қилиш ҳақида”ги Қонун маъқулланди.
Битимнинг асосий мақсади фитосанитария хавфсизлигини таъминлаш, икки давлат ҳудудига карантин зарарли организмларнинг кириб келиши ва тарқалишининг олдини олиш мақсадида ўсимликлар карантини ва муҳофазаси соҳасида икки томонлама ҳамкорликни ривожлантиришдан иборат.
“Ўсимликлар карантини бўйича халқаро ҳамкорлик ҳар икки давлатнинг фитосанитар хавфсизлигини таъминлашда муҳим аҳамиятга эга. Ушбу Битим карантин чораларини такомиллаштириш ва зарур ўзаро муносабатларни ривожлантириш масалаларини қамраб олади. Масалан, норматив-ҳуқуқий ҳужжатлар, карантиндаги зарарли организмларнинг миллий рўйхати, шунингдек, бошқа қоидалар алмашинуви, ўсимликлар карантини ва уларни муҳофаза қилиш соҳасида илмий-тадқиқот институтлари ва ташкилотлари ўртасида илмий ҳамкорликни ривожлантириш кўзда тутилган. Бундан ташқари, Битимда импорт қилинадиган товарларга, фитосанитария сертификатига ва товарларнинг транзитига қўйиладиган талаблар белгилаб қўйилган”, – деди сенатор Ернур Айткенов.
Унинг сўзларига кўра, сўнгги уч йилда Қозоғистондан Туркияга 700 минг тонна ўсимлик маҳсулотлари экспорт қилинган, Туркиядан эса 40 минг тоннага яқин қишлоқ хўжалиги экинлари ва 2,7 минг дона уруғлик импорт қилинган. Карантин остидаги барча маҳсулотлар фитосанитария назоратидан ўтказилади.
“Ўтган уч йилда Туркиядан олиб келинган 76 партия маҳсулот фитосанитария талабларига жавоб бермаслиги аниқланди. Агар карантин зараркунандалари аниқланса, уларнинг тарқалишининг олдини олиш учун тегишли чоралар кўрилади. Ушбу чора-тадбирлар халқаро мажбуриятлар ва миллий қонунчиликка мувофиқ амалга оширилади. Мазкур қонуннинг қабул қилиниши икки давлат ўртасидаги ҳамкорликни мустаҳкамлаш, карантин хизматлари фаолиятини яхшилаш имконини беради. Қонуннинг қабул қилиниши ижтимоий-иқтисодий ва ҳуқуқий муаммоларни келтириб чиқармайди ва бюджетдан қўшимча харажатларни талаб қилмайди”, – деди Е.Айткенов.
Ўз навбатида, сенатор Султан Дуйсембинов Туркия Қозоғистоннинг бешта йирик савдо ҳамкорларидан бири эканлигини таъкидлади. Бундан ташқари, у энг яхши 10 инвесторлар қаторига киради. Ўтган йили икки давлат ўртасидаги товар айирбошлаш ҳажми 6 миллиард доллар, экспорт ҳажми 3,6 миллиард доллар, импорт қилинган турк товарлари ҳажми эса 2 миллиард долларни ташкил этди.
