Қозоғистон ва Сербия ҳукуматлараро қўшма комиссия фаолиятини фаоллаштириш ниятида

BELGRAD. Kazinform - Қозоғистон Элчиси Мади Атамқулов Сербия ҳукуматида Савдо-иқтисодий ҳамкорлик бўйича Қозоғистон-Сербия ҳукуматлараро комиссияси ҳамраиси бўлган Сербия Республикасининг Инновация ва технологик ривожланиш вазири Ненад Попович билан учрашди. Бу ҳақда Kazinform Қозоғистон Республикаси Ташқи ишлар вазирлиги матбуот хизматига таяниб хабар беради.

Мулоқот чоғида суҳбатдошлар икки давлат ўртасидаги муносабатларнинг дўстона характерини тасдиқладилар ва икки томонлама иқтисодий ҳамкорликнинг бугунги ҳолатини муҳокама қилдилар.

Қозоғистон Элчиси вазирга Президент Қасим-Жомарт Тоқаевнинг «Янги Қозоғистон»ни қуришга қаратилган сиёсий ислоҳотлар дастури ҳақида маълумот берди. Жорий йилда Белградда ҳукуматлараро қўшма комиссиянинг 3-йиғилишини ўтказиш масаласига алоҳида эътибор қаратилди.

Томонлар фикрича, ўзаро товар айирбошлаш ҳажмининг ўсишини таъминлаш, сармоявий ҳамкорликни фаоллаштириш, тўғридан-тўғри авиақатновлар очиш, ҳамкорликнинг устувор йўналишларида (қишлоқ хўжалиги, IТ-сектор, логистика, қурилиш ва бошқа) қўшма лойиҳаларни амалга ошириш каби долзарб масалалар бўйича қарорлар ишлаб чиқиш ва келишилган ҳаракатларни амалга ошириш муҳокамани тақозо этади.