Қозоғистон ва Германия президентлари кенгайтирилган таркибда музокара ўтказди
Давлат раҳбари Германия Президенти бошчилигидаги Германия делегациясига эътибор қаратиб, Франк-Вальтер Штайнмайернинг давлат ташрифи Қозоғистон билан Германия ўртасидаги ҳар томонлама ҳамкорликни мустаҳкамлашга кенг йўл очаётганини таъкидлади.
«Биз сизнинг ташрифингизни интиқлик билан кутган эдик. Мазкур ташриф Қозоғистон ва Германия ўртасидаги ҳамкорлик ривожига янги суръат бағишлайди. Германия Қозоғистоннинг Европа Иттифоқидаги асосий ҳамкорларидан биридир. Турли соҳаларда ҳамкорликни мустаҳкамлаш учун барча имкониятларни ишга соламиз. Биз ўзаро ҳамкорлигимиз, халқаро ташкилотлардаги фаолиятимиз, шунингдек, геосиёсий вазият билан боғлиқ кўплаб масалалар юзасидан батафсил ва очиқ фикр алмашдик», – деди Қозоғистон Президенти.
Музокаралар чоғида савдо-иқтисодий ҳамкорликни кенгайтиришга алоҳида эътибор қаратилди. Германия Қозоғистоннинг Европа Иттифоқидаги муҳим савдо-иқтисодий ва сармоявий шерикларидан бири. Германиянинг Марказий Осиё давлатлари билан ташқи савдосининг 80 фоиздан ортиғи Қозоғистонга тўғри келади.
Энергетика, қайта ишлаш саноати, машинасозлик, транспорт ва логистика, қайта тикланадиган энергия манбалари, ноёб тупроқ металларини ривожлантириш ва қишлоқ хўжалиги икки томонлама муносабатларнинг муҳим йўналишлари ҳисобланади. Шу билан бирга, Давлат раҳбари немис компанияларини Қозоғистоннинг яшил энергия соҳасига сармоя киритишга таклиф этди. Хусусан, томонлар яшил водород ишлаб чиқариш заводи қурилиши бошланишини олқишлади. У Svevind Energy немис-швед компанияси томонидан амалга ошириляпти. Ушбу лойиҳага киритилган сармоя миқдори 50 миллиард долларни ташкил этади.
Қасим-Жомарт Тоқаев Франк-Вальтер Штайнмайернинг Ақтауга ташрифини олқишлашини айтди. Германия Президенти Манғистау вилоятининг улкан иқтисодий салоҳияти билан танишишни режалаштирган.
«Манғистау вилоятига ташриф буюрганингизни юксак қадрлайман. Бу ишбилармонлик ҳамкорлиги соҳасидаги муваффақиятларимиз кўзгуси, деб ўйлайман. Билишимча, сиз денгиз портига бориш ниятидасиз», – деди ҚР Президенти.
Учрашувда томонлар Транскаспий халқаро транспорт йўналиши доирасидаги ўзаро фаолиятни кучайтиришга алоҳида эътибор қаратди.
Қасим-Жомарт Тоқаев Хитой-Европа йўналишида қуруқлик орқали ташилаётган юкларнинг 80 фоизи Қозоғистон ҳудуди орқали ўтишини таъкидлаб, мамлакат минтақавий марказга айлана бошлаганига алоҳида эътибор қаратди. Давлат раҳбарининг фикрича, Шарқ ва Ғарб бозорларини боғловчи ушбу транспорт-логистика йўлаги катта стратегик аҳамиятга эга. Ўтган йили ушбу йўналиш орқали 1,7 миллион тоннага яқин юк ташилган. Бу 2021 йилга нисбатан икки баробар кўп.
Бундан ташқари, Давлат раҳбарлари қишлоқ хўжалиги, муқобил энергия манбалари, махсус иқтисодий зоналар ва молия институтлари каби соҳалардаги ҳамкорлик истиқболларини кўриб чиқди.
Франк-Вальтер Штайнмайер Қасим-Жомарт Тоқавга Астанага махсус таклифи ва қозоқ халқига хос меҳмондўстлиги учун миннатдорчилик билдирди. Кичик гуруҳдаги музокаралар муваффақиятли ўтганини ва қўшма лойиҳаларни амалга ошириш муҳимлигини таъкидлади.
«Икки томонлама муносабатларимиз ҳолати ҳақида айтганларингизни тасдиқлайман. Биз нафақат сўнгги 30 йиллик дипломатик муносабатларимизга, балки сиз таъкидлаганингиздек, барча соҳалардаги ҳамкорлигимизни жадал ривожлантиришга ҳам эътибор қаратамиз. Немис компаниялари Қозоғистонга катта маблағ йўналтирмоқда ва бу йўналиш фақат иқтисодий соҳа билан чекланиб қолмайди. Биз жаноб Президент билан умумий позицияга эгамиз ва Қозоғистонда амалга оширилаётган кенг кўламли ислоҳотларга катта ҳурмат билан қараймиз. Германия Сиз ва Ҳукуматингиз коррупцияга қарши курашаётганингизни, ўлим жазосига мораторий киритганингизни, Конституциявий суд тузганингизни, Парламентни мустаҳкамлаганингизни яхши билади. Менимча, буларнинг барчаси бутун дунёга маълум. Бу, шунингдек, Сиз президентлик фаолиятини бошлаганингизда бутун дунёга ва Қозоғистон халқига эълон қилган йўналишингиздан амал қилаётганингиздан далолат», – деди Германия Федерал Президенти.
