Қозоғистон ва Европа Иттифоқи ўртасидаги товар айирбошлаш беш ой ичида 20,2 млрд долларга етди
ASTANA. Kazinform - Жорий йилнинг беш ойида ўзаро товар айирбошлаш ҳажми 20,2 миллиард долларга етди, бу Қозоғистон умумий савдо айланмасининг 37 фоизини ташкил этади. Бу ҳақда Европа Иттифоқининг ташқи ишлар ва хавфсизлик сиёсати бўйича Олий вакили – Еврокомиссия вице-президенти Жозеп Боррелнинг Қозоғистонга расмий ташрифи чоғида ҚР Бош вазири ўринбосари – Ташқи ишлар вазири Мурат Нуртилеу маълум қилди, деб хабар беради Kazinform мухбири.
Қозоғистон томонининг фикрича, Европа Иттифоқи билан сиёсий, савдо-иқтисодий ва гуманитар интеграциямиз жадал ва сифат жиҳатидан кенгаймоқда.
«Европа Иттифоқи Қозоғистоннинг энг йирик савдо ва сармоявий шерикларидан биридир, деди Қозоғистон Республикаси вазири. Жорий йилнинг беш ойида ўзаро товар айирбошлаш ҳажми 20,2 миллиард долларга етди. Бу кўрсаткич мамлакатимиз умумий савдо айланмасининг 37 фоизини ташкил этади. 2023 йилга келсак, товар айирбошлаш ҳажми 41 миллиард доллардан ошди. Ўтган йили Қозоғистон иқтисодиётига Европа Иттифоқи давлатларидан 10,4 миллиард долларлик инвестициялар жалб этилди. 2005 йилдан бери инвестициялар 180 миллиард доллардан ортиқни ташкил этди”, - деди Мурат Нуртилеу ОАВ вакилларига.
Унинг қўшимча қилишича, уч мингдан ортиқ Европа компанияси иқтисодиётимизнинг турли тармоқларида фаолият юритиб келади. Улар орасида Eni, Total, Amazonen-Werke, Air Liquide, Alstom, Carlsberg каби таниқли компаниялар бор.
Қозоғистон ташқи ишлар вазирининг сўзларига кўра, ҳамкорликнинг анъанавий устувор йўналишлари энергетика, транспорт ва логистика, қишлоқ хўжалиги, машинасозлик ва ишлаб чиқариш, ахборот технологиялари бўлган.
«Бу сафар биз асосий эътиборни CRM, яъни муҳим хом ашё бўйича ҳамкорликни ривожлантиришга қаратдик. Шу билан бирга, Қозоғистон ҳукумати Европа компаниялари ва ишбилармон доираларининг мамлакатимизга келишини олқишлайди. Бундан ташқари, трансконтиненталь темир йўл, ҳаво ва автомобиль транспорти йўлакларини ривожлантириш муҳимлиги таъкидланди. Европа Иттифоқи Транскаспий халқаро транспорт йўналишини биргаликда ривожлантиришдан манфаатдор эканини тасдиқлайди”, - дея аниқлик киритди Мурат Нуртилеу.
Шунингдек, ҚР Ташқи ишлар вазирлиги фаолиятининг муҳим йўналишларидан бири Европа Иттифоқининг Қозоғистон фуқаролари учун виза режимини соддалаштириш ҳисобланади. ҚР Ташқи ишлар вазири Жозеп Боррель билан яқин келажакда ушбу муҳим муаммога ижобий ечим топиш учун ҳамкорлик қилишга келишиб олди.
«Ҳар доимгидек кун тартибидаги долзарб минтақавий ва халқаро масалалар ҳам эътибордан четда қолмади. Хусусан, Марказий Осиёдаги муаммолар, жумладан, минтақадаги иқлим ўзгариши, Афғонистон ва Яқин Шарқдаги вазият муҳокама қилинди. Биз ҳамкасбим билан биргаликда дунёда рўй бераётган низоларни фақат суверенитет, мустақиллик ва ҳудудий яхлитлик тамойиллари асосида, Бирлашган Миллатлар Ташкилоти Устави асосида ҳал этиш зарурлигини эълон қилдик”, - деди ҚР Ташқи ишлар вазирлиги раҳбари.
