Қозоғистон Президентига Евроосиё тараққиёт банкининг ўрта муддатли режаси тақдим этилди
Учрашувда Президентга Евроосиё тараққиёт банки фаолияти якунлари ва унинг ўрта муддатли режалари, шунингдек, келгуси давр учун макроиқтисодий прогнозлари ҳақида маълумот берилди. Банк экспертлари Қозоғистондаги ижобий ўсиш суръати Евроосиё иқтисодий иттифоқига аъзо давлатлар билан солиштирганда энг юқори даражада бўлишини тахмин қилмоқда.
Қасим-Жомарт Тоқаев Евроосиё тараққиёт банки 2022-2026 йилларга мўлжалланган стратегиясининг асосий йўналишлари билан ҳам танишди. Хусусан, Николай Подгузов Президентга Қозоғистон ва Евроосиё иқтисодий иттифоқига аъзо бошқа давлатларнинг ижтимоий-иқтисодий ривожланишига ҳисса қўшадиган муҳим мегалойиҳалар ҳақида сўзлаб берди.
Банк «Шимол-Жануб», «Европа-Ғарбий Хитой» транспорт даҳлизларини очиш, ягона савдо тармоғини яратиш ва Марказий Осиё сув-энергетика комплексини модернизация қилишга қаратилган лойиҳаларни амалга оширишга кўмаклашиш ниятида. Евроосиё тараққиёт банки ушбу лойиҳаларга 1,2 миллиард доллар сармоя киритишни режалаштирмоқда. Умуман олганда, банк 2026 йилгача Қозоғистон иқтисодиётига камида 3,8 миллиард доллар сармоя киритиш ниятида.
Президент Евроосиё тараққиёт банкининг интеграция жараёнларини ривожлантиришдаги фаол ролини қайд этиб, Қозоғистон ва Евроосиё иқтисодий иттифоқига аъзо бошқа давлатларда лойиҳаларни амалга ошириш муҳимлигини таъкидлади.