Қозоғистон Президенти Бишкекдаги мактаб-гимназияга автобус совға қилди
BISHKEK. Кazinform — Бишкекдаги 33-мактаб-гимназиясида Қозоғистон Президенти Қасим-Жомарт Тоқаев номидан таълим муассасасига мактаб автобусисовға қилиш ҳамда Давлат раҳбарининг қирғиз тилига таржима қилинган “Ота ҳақида ўйлар” китобининг тақдимоти бўлиб ўтди, деб хабар беради Kazinform мухбири.
Тадбирда Президент Администрацияси, Парламент, Таълим вазирлиги, шаҳар ҳокимлиги, ижодкор зиёлилар, дипломатик корпус ва қозоқ жамоатчилиги вакиллари, мактаб ўқувчилари ва педагоглар жамоаси иштирок этди.
Қозоғистоннинг Қирғизистон Республикасидаги элчиси Рапил Жошибаев ўз нутқида қаҳрамонлик тарихига эга таълим муассасасида ўтказилган тантанали тадбирнинг рамзий аҳамиятини таъкидлади.
— Буюк Ғалабанинг 80 йиллиги арафасида биз ушбу мактабнинг халқларимизнинг умумий тарихига қўшган ҳиссасини чуқур ҳурмат қиламиз. 1940 йилда ташкил этилган таълим муассасаси бугунги кунда шаҳар аҳамиятига эга бўлган тарихий ёдгорлик саналади. Уруш йилларида мактабда Фрунзе номидаги ҳарбий пиёдалар билим юрти жойлашган. Курсантларнинг биринчи гуруҳи Қирғизистон, Қозоғистон ва Ўзбекистондан муддатли ҳарбий хизматни ўтаётган ҳарбий хизматчилардан иборат эди. Мактаб автобуси Қозоғистон Республикаси Президенти Қасим-Жомарт Тоқаев номидан унинг отаси ўқиган мактабга ҳурмат белгиси сифатида совға қилинди. Бу автобус ёш авлодга ғамхўрлик, таълим-тарбияни қўллаб-қувватлаш, муносиб келажакка ишонч рамзидир, – деди Элчи.
Бундан ташқари, қозоғистонлик дипломат Қозоғистон Республикаси Алматидаги Сатбаев университети қошидаги 33-сонли Бишкек мактаб-гимназияси битирувчиларига ётоқхонада яшаш имконияти билан учта бепул таълим квотаси тақдим этишини маълум қилди.
Шаҳардаги 33-мактаб-гимназия директори Таалайкул Ашимова ўз миннатдорчилигини билдириб, бу совға аждодлар руҳига ҳурмат сифатида қабул қилинаётганини таъкидлади.
— 33-мактаб-гимназиясининг барча ўқувчилари, ота-оналари ва ўқитувчилари номидан Қозоғистон Президенти Қосим-Жомарт Токаевга чексиз миннатдорчилик билдираман. Хайрия қилинган мактаб автобуси ўқувчиларга катта қувонч бағишлайди, янги билимлар, қувончли тажрибалар ва кашфиётлар сари йўл очади. Хусусан, ушбу тадбирни қардош Қирғизистон ва Қозоғистон халқлари тарихига аждодларимиз ва барча Иккинчи жаҳон уруши қатнашчилари хотирасига бағишланган эҳтиром, деб биламан, — деди мактаб директори.
Бундан ташқари, тадбир давомида Қозоғистон Республикаси Президенти Қасим-Жомарт Тоқаевнинг “Ота ҳақида ўйлар” («Атам жөнүндө баян») китобининг қирғиз тилига таржимаси тақдимоти ўтказилди. Шу муносабат билан Қирғизистон Республикаси Президенти Садир Жапаровга ушбу китобнинг эсдалик нусхасини топшириш маросими бўлиб ўтди.
Қирғизистон Республикаси Президенти маслаҳатчиси Арслан Қойчиев битирувчилари орасида Қозоғистоннинг таниқли арбоблари Рахимжон Қошқарбаев ва Кемел Токаев ҳамда бошқа машҳур қаҳрамонлар бор таълим муассасасида ўтказилаётган тадбирнинг аҳамиятини таъкидлади.
— Қасим-Жомарт Тоқаевнинг “Ота ҳақида ўйлар” китоби ёзувчи оиласи тақдирига бағишланган бўлиб, отаси бошидан кечирган оғир йиллар тасвирланган. Унда 1933 йилда Қирғизистонда содир бўлган воқеалар ҳақида жуда кўп маълумотлар бор.Қирғиз жамоатчилиги Қ.Toқаев ҳаётини яқиндан билишга қизиққанлиги сабабли китобни қирғиз тилига Чинара Океева таржима қилган. Қирғизистон ва Қозоғистон ўртасидаги дўстлик ва ҳамкорлик янада мустаҳкамланишини тилайман, — деди у.
Китобнинг қирғиз тилига таржимаси муаллифи Чинара Океева “Ота ҳақида ўйлар” китоби уни бир неча сабабларга кўра чуқур таъсирлангани ва қизиқтирганини тан олди.
— Бу асар билан отамнинг вафотидан чуқур қайғурган даврда танишганман. Шунинг учун ҳам мен юқори мартабали сиёсатчи (Қасим-Жомарт Тоқаев)нинг отаси ҳақидаги хотираларига бағишланган китобини ўқишга қизиқдим. Икки халқнинг оғир йиллардаги муштарак тарихидан ҳикоя қилувчи ҳикоялар мени қаттиқ таъсирлантирди. Оиланинг ҳар бир аъзосига бўлган улкан меҳр-муҳаббатга тўла китоб ўқувчини ўша даврдаги оила институти билан атрофлича таништиради, – дейди Ч. Океева.
