Қозоғистон хорижий ОАВда: Россия ва Франция президентларининг ташрифи ҳамда Абу-Даби - Туркистон рейси
Жорий ҳафтада хорижий ОАВда туркийзабон ахборот агентликлари иттифоқи, Абу-Даби - Туркистон рейси, Франция ва Россия президентларининг Қозоғистонга ташрифи ҳақида туркум мақолалар чоп этилди. Батафсил Кazinform экспертлари шарҳида ўқинг.
Anadolu: Турк тилидаги ахборот агентликлари альянси ташкил этилди
Туркиянинг Anadolu агентлиги 6 ноябрь куни Туркиянинг Истанбул шаҳрида бўлиб ўтган туркий тилли давлатларнинг медиа саммити доирасида туркий тилли ахборот агентликлари альянсини ташкил этиш тўғрисидаги декларация имзоланганини маълум қилди.
Альянсга «Qazcontent» АЖ (Қозоғистон), Anadolu ajance (Туркия), AZERTAC (Озарбайжон), KABAR (Қирғизистон), UzA (Ўзбекистон) халқаро ахборот агентликлари қўшилди.
Бундан буён туркий тилли давлатлар ўртасида ахборот алмашинуви, сохта хабарларга қарши биргаликда курашиш, тажриба алмашиш йўлга қўйилади. Шунингдек, туркий давлатлар ахборот агентликларининг “Оммавий ахборот воситаларида бирлик ва келажакка қараш” мавзусидаги медиафорумида рақамли воситалардан самарали фойдаланиш ва қўшма лойиҳаларни амалга ошириш масалалари муҳокама қилинди.
Zawya: Абу Даби - Туркистон авиачипталари сотувга чиқди
Zawya агентлиги Бирлашган Араб Амирликларининг «Wizz Air Abu Dhabi» миллий компанияси Марказий Осиёнинг энг муҳим тарихий шаҳарларидан бири бўлган Туркистонга ҳаво рейсини очишини маълум қилди. Янги маршрут биродарлашган шаҳарлар аҳолиси ва меҳмонлари учун туризм имкониятларини кенгайтириши кутилмоқда. Биринчи рейс 2024 йилнинг февраль ойида амалга оширилиши режалаштирилган. Чипталар аллақачон сотувга чиқарилган. Wizzair.com расмий веб-сайти ва мобил иловасида сотилади. Чипта нархи 20 000 тенгедан (159 дирҳам) бошланади. Парвозлар сешанба, пайшанба ва шанба кунларига режалаштирилган. Эслатиб ўтамиз, й йўловчилар Wizz Flex ёрдамида чипталарни брон қилишлари мумкин. Бундан ташқари, парвозни уч соат олдин ҳеч қандай комиссиясиз ўзгартириш мумкин. Авиакомпания кредити сифатида саёҳат нархининг 100 фоизи қопланади.
«Wizz Air Abu Dhabi» миллий компанияси бошқарувчи директори Йохан Эйдхагеннинг сўзларига кўра, сайёҳларнинг Қозоғистонга, жумладан, Туркистон вилоятининг сайёҳлик салоҳиятига қизиқиши ортиб бормоқда, унинг ажойиб манзаралари ва бой маданияти туфайли. Қадимги Ипак йўлини кашф қилишни хоҳловчилар учун қизиқарли ва арзон саёҳат таклиф этилади. Туркистонга янги йўналиш ушбу авиакомпаниянинг Қозоғистондаги учинчи йўналиши ҳисобланади.
Қайд этиш жоизки, Туркистон халқаро аэропорти бугунги кунда Истанбул ва Ал-Қувайт каби халқаро йўналишларга ҳамда Астана, Алмати, Ақтау, Ақтўбе, Орал, Қарағанди каби республика ичидаги ҳаво йўналишларига хизмат кўрсатади.
Foreignpolicy: Қозоғистон раҳбари бетарафликни санъатга айлантирмоқда
Foreignpolicy ахборот агентлиги Қозоғистон Президенти Қосим-Жомарт Тоқаев Россия, Хитой ва Ғарб ўртасидаги мувозанатни сақлаган ҳолда ўз имкониятларини максимал даражада ошираётгани ҳақида ёзди.
Қозоғистонлик мустақил сиёсий таҳлилчи Димаш Алжанов Foreign Policy нашрига берган интервьюсида шундай ёзади: “Қозоғистон асосий иштирокчиларнинг эҳтиёжларини билади ва барчани мамнун қилиш ва санкциялардан қочиш учун қўлидан келганини қилмоқда”.
Reuters: "Кўп қутбли дунёни шакллантириш жараёни жуда оғир вазиятда кечмоқда"
7 ноябрь куни Reuters ахборот агентлигининг хабар беришича, Қозоғистон Республикаси Президенти Қасим-Жомарт Тоқаев “Известия” газетасига берган интервьюсида дунёнинг турли бурчакларида можароларнинг кучайиши, санкциялар қарама-қаршилиги, савдо уруши авж олган пайтда замонавий кўп қутбли дунёни шакллантириш жараёни ўта оғир вазиятда кечаётганини маълум қилган.
Аммо Қасим-Жомарт Тоқаев “Известия” газетасига берган интервьюсида “ҳар қандай можаро БМТ Низоми нормалари ва тамойилларига мувофиқ ҳал этилиши мумкинлигига тўлиқ ишонишини” айтди.
“Аммо мен соғлом фикр ва ҳамжиҳатлик бўлиниш ва худбинликдан устун келишига ишончим комил. Жаҳон тарихида бундай мисоллар етарли. Охир-оқибат, бутун дунё халқлари узоқ муддатли тинчлик ўрнатиладиган кунга етади", - деди у.
Anadolu: Кремль Путиннинг Қозоғистонга ташрифи Европанинг Астана билан алоқаларидан “мустақил” эканини эълон қилди
Anadolu агентлигининг ёзишича, Владимир Путиннинг Қозоғистонга ташрифи олдидан Кремль “бу ташриф икки томонлама муносабатларни ривожлантиришга қаратилганини” эълон қилган.
Мақолада Кремль Путин пайшанба куни Қозоғистонга ташриф буюриши, унинг давомида қозоғистонлик ҳамкасби Қасим-Жомарт Тоқаев билан музокаралар ўтказиши, Қостанайда бўлиб ўтадиган XIX Россия-Қозоғистон ҳудудлараро ҳамкорлик форумида видеоалоқа орқали иштирок этиши ва бир қатор шартномалар имзолаши таъкидланган.
Еmerging-europe: Самарали хусусий капитални жалб этиш - Қозоғистонда диверсификациянинг калити
Еmerging-europe агентлигининг 7 ноябрь куни хабар беришича, Қозоғистоннинг “Байтерек” давлат холдинги ислоҳоти узоқ муддатли ривожланишга, самарали молия бозорларини ривожлантиришга ва хусусий капитални самарали жалб этишга таъсир қилиши мумкин. Жаҳон банкининг янги ҳисоботига кўра, Қозоғистоннинг “Байтерек” давлат холдинги ўзининг тўлиқ салоҳиятига эришиш учун унинг бошқаруви, ташкилий тузилмаси ва фаолиятига кўпроқ эътибор қаратиши, ўрта муддатли ривожланишга таъсир кўрсатиши ва молиявий бозорни яратиши зарур.
"Байтерек" Қозоғистон давлат холдинг компанияси бўлиб, йирик давлат ресурсларидан фойдаланган ҳолда соддалаштирилган молиялаштириш ва рискларни тақсимлаш орқали иқтисодиётнинг ноишлаб чиқариш тармоқларини, жумладан, кичик ва ўрта бизнес, қишлоқ хўжалиги ва уй-жой қурилишини ривожлантиришга қаратилган.
2022 йилга келиб, "Байтерек" нинг жамланган активлари мамлакат ялпи ички маҳсулотининг қарийб 12 фоизигача ўсди.
Euractiv: Қозоғистон жозибадор “ядровий” ўйинчига айланмоқда
Euractiv агентлигининг ёзишича, Қозоғистон 7 ноябрь куни ўз тарихидаги илк атом электр станциясини қуриш бўйича референдум ўтказишга тайёрланар экан, уранга бой мамлакат атом энергияси ва стратегик фойдали қазилмалар соҳасида жозибадор ўйинчига айланиб бормоқда. Европа ва Осиё ва халқаро ҳамжамият эътиборини тобора ўзига тортаётир.
Президент Қасим-Жомарт Тоқаев сентябрь ойида Қозоғистон халқига йил сайин йўллайдиган Мурожаатида Қозоғистон яқинда биринчи атом электр станциясини қуриш ёки қурмаслик бўйича референдум ўтказишини маълум қилган эди. Марказий Осиёдаги энг йирик ва ресурсларга бой давлат саналган Қозоғистон Ҳукумати бу ғояни анчадан бери муҳокама қилиб, энергия ишлаб чиқариш қувватларини диверсификация қилиш зарурлигини таъкидлаб келади. У ҳатто Алмати вилоятининг жануби-шарқий қисмида атом электр станцияси қурилиши мумкин бўлган жойни ҳам аниқлади.
“Бизда технологиялар ва ресурслар бор, агар Қозоғистон халқи умумхалқ референдумида бундай қадамни ёқлаб овоз берса, атом энергетикасини ривожлантириш учун бизда етарлича ирода мавжуд”, — деди Қозоғистон Ташқи ишлар вазири ўринбосари Роман Василенко Астанадаги Euractiv иштирок этган матбуот анжуманида.
