Қозоғистон Гвинея-Бисауни Африка қитъасидаги муҳим ҳамкор деб билади

ASTANА. Кazinform — Давлат раҳбари Гвинея-Бисау Президентининг ташрифини тарихий, деб баҳолади. Бу ҳақда Президент Қасим-Жомарт Тоқаев мамлакатда расмий ташриф билан бўлиб турган Гвинея-Бисау Президенти Умару Сисоку Эмбало билан кенгайтирилган музокаралар чоғида маълум қилди.

— Таклифимни қабул қилганингиз учун чин дилдан миннатдорчилик билдираман. Бу Гвинея-Бисау Президенти сифатида Қозоғистонга биринчи ташрифингиздир. Буни тарихий ташриф деб аташ мумкин. Олий даражадаги мазкур учрашув мамлакатларимиз ўртасидаги муносабатларнинг янги даврига замин яратишига ишонамиз. Биз Гвинея-Бисау Республикасини Африка қитъасидаги муҳим ҳамкор деб биламиз. Ўтган йили мамлакатларимиз ўртасида дипломатик муносабатлар ўрнатилганига 10 йил тўлди. Бу давр мобайнида биз ўзаро ёрдам ва мустаҳкам дўстликка асосланган ҳамкорликни йўлга қўйдик. Ҳамкорлигимизни янада ривожлантириш учун катта имкониятлар мавжуд, – деди Қасим-Жомарт Тоқаев.

Давлат раҳбари, айниқса, иқтисодиёт ва савдо соҳалари салоҳияти юқори эканини алоҳида таъкидлади.

— Бугунги ташрифингизни мамлакатларимиз ўртасидаги ҳамкорликни мустаҳкамлаш йўлидаги муҳим қадам, деб биламан. Жаноб Президент, Қозоғистонга ташрифингиз дастури кенг қамровли эканини биламан. Сиз бир қатор ишлаб чиқариш жойларига ташриф буюрасиз. Катта марказлар ишини кўрасиз, – деди Президент.

Аввалроқ, Давлат раҳбари Қасим-Жомарт Тоқаев мамлакатга расмий ташриф билан келган Гвинея-Бисау Президенти Умару Сисоку Эмбалони Ақордада тантанали кутиб олгани ҳақида хабар берган эдик.