Қозоғистон Эронга буғдой экспортини йилига 2 миллион тоннага етказишни режалаштирмоқда

ASTANA. Kazinform – ҚР Қишлоқ хўжалиги вазири Айдарбек Сапаров Астанага ташриф буюрган Эрон делегацияси, хусусан, Эрон Ислом Республикаси Қишлоқ хўжалиги жиҳод вазири жаноб Ғуломризо Нури Гезелже билан учрашди. Бу ҳақда ҚР Қишлоқ хўжалиги вазирлиги матбуот хизмати хабар берди.

Йиғилишда ғалла экспорти масаласига алоҳида эътибор қаратилди. 2024 йил сентябрь ойидан бери Қозоғистон Эронга 960 минг тонна янги дон экспорт қилди, бу ўтган йилнинг шу даврига нисбатан 17 баробар кўпдир. Режага кўра, буғдой экспорти ҳажми йилига 2 миллион тоннага, арпа экспорти эса 1 миллион тоннага етказилади.

“Эронга ғалла ва ёғли ўсимликлар экспорти бўйича юқори салоҳиятга эгамиз. Қозоғистон ҳар йили 500 минг тоннагача кунгабоқар ёғи ва кунгабоқар уруғини етказиб бера олади. Бундан ташқари, қишлоқ хўжалиги маҳсулотларини чуқур қайта ишлаш соҳасида сармоявий шерикликни ривожлантириш истиқболли йўналиш ҳисобланади, – деди Айдарбек Сапаров.

Томонлар ўзаро савдони ошириш масалаларини ҳам кўриб чиқдилар. 2024 йил якунларига кўра, икки давлат ўртасида қишлоқ хўжалиги соҳасида товар айирбошлаш ҳажми 220,1 миллион АҚШ долларини ташкил этиб, 2023 йилга нисбатан 33,2 фоизга ўсган бўлса, 2025 йилнинг тўрт ойида бу кўрсаткич 139 фоизга ўсиб, 151,1 миллион АҚШ долларига етди. Улардан Қозоғистондан экспорт ҳажми 3 баробар ошиб, 116,7 миллион долларни ташкил этди. Етказиб берилаётган асосий маҳсулотларга арпа, ёғли ўсимликлар, гўшт, ўсимлик мойи, маккажўхори ва дуккакли экинлар киради.

Эрон қишлоқ хўжалиги жиҳод вазири ҳамкорликни, жумладан, технологик йўналишда ҳам кенгайтиришга тайёрлигини билдирди.

“Эрон ғалла, айниқса, буғдой ва арпа сотиб олишни кўпайтиришдан манфаатдор. Биз қозоғистонлик етказиб берувчилар билан узоқ муддатли шартномалар тузишга, шунингдек, муҳандислик суғориш тизимлари, ветеринария ва наслли чорвачилик генетикаси соҳаларида тажриба ва технологиялар алмашишга тайёрмиз. Эрон компаниялари Қозоғистонда муваффақиятли фаолият юритмоқда ва биз сармоявий иштирокни кенгайтириш учун катта имкониятларни кўряпмиз”, – деди Ғуломризо Нури Гезелже.

Айдарбек Сапаров қишлоқ хўжалиги бўйича икки томонлама Ишчи гуруҳ доирасидаги ҳамкорликни давом эттириш ниятини тасдиқлади. Бу гуруҳнинг илк йиғилиши жорий йилнинг февраль ойида Теҳронда бўлиб ўтган эди.

“Ишончим комилки, бугунги учрашув Қозоғистон ва Эрон ўртасидаги шериклик муносабатларини ривожлантиришга янги суръат бағишлайди. Қишлоқ хўжалиги мажмуаси икки давлат ўртасидаги ўзаро товар айирбошлаш ҳажмини 3 миллиард долларга етказиш мақсадига эришишда асосий устунлардан бири бўлади”, – дея хулоса қилди вазир.

Музокараларнинг муҳим натижаси сифатида иккита англашув меморандуми имзоланди. Қозоғистон дон иттифоқи ва Эрон озиқ-овқат саноати ассоциацияси дон, чорва озуқаси ва қўшимчалар савдосини ривожлантириш, шунингдек, маҳсулот логистикасида Эрон порт инфратузилмасидан фойдаланишга келишиб олди. Бундан ташқари, «Темиртау Трейд» МЧЖ ва Эрон озиқ-овқат саноати уюшмаси ўртасида қишлоқ хўжалиги маҳсулотларини етказиб бериш соҳасида меморандум имзоланган.