Қозоғистон БРИКСни глобал тараққиётнинг ҳаракатлантирувчи кучларидан бири деб билади – ҚР Президенти

KAZAN. Kazinform – Қозоғистон БРИКСни глобал тараққиётнинг ҳаракатлантирувчи кучларидан бири деб билади. Бу ҳақда Давлат раҳбари Қасим-Жомарт Тоқаев БРИКС XVI саммити ялпи мажлисининг «БРИКС+»/«аутрич» форматидаги мажлисида маълум қилди.

“Мамлакатимиз БРИКСга аъзо давлатларнинг Яқин Шарқдаги вазиятнинг кескинлашувидан хавотирланишини қўллаб-қувватлайди. Қашшоқлик, тенгсизлик ва таълим етишмаслиги каби можароларнинг асосий сабабларини биргаликда бартараф этиш, бизнингча, халқаро сиёсий ҳамкорликни мустаҳкамлашнинг асосий омили бўлиб қолмоқда. Қозоғистон БМТ Хавфсизлик кенгашини ислоҳ қилиш ва унинг Африка, Лотин Америкаси ва Осиё давлатларидан янги аъзолар қўшилиши ҳисобига кенгайтирилишини қўллаб-қувватлайди”, – деди Қасим-Жомарт Тоқаев.

Давлат раҳбари тинчлик ва хавфсизлик масалаларини ҳал этишда жаҳон жануби давлатларининг овози янграши кераклигини таъкидлади.

“БРИКС глобал бошқарув тузилмасида ўрта кучлар ва ривожланаётган иқтисодлар деб аталадиган давлатларнинг вакиллигини кучайтириш орқали бу жараёнда ҳал қилувчи рол ўйнаши мумкин. Қозоғистон БРИКСни глобал тараққиётнинг ҳаракатлантирувчи кучларидан бири деб билади”, – деди Президент.

Эслатиб ўтамиз, Қозоғистон Республикаси Президенти Қасим-Жомарт Тоқаев Россия Федерацияси Президенти Владимир Путиннинг таклифига биноан БРИКСга аъзо давлатлар раҳбарларининг ХVI саммитида иштирок этиш учун Қозон шаҳрига борди.

Давлат раҳбари БРИКС саммити иштирокчилари билан қатор учрашувлар ўтказди.

Қозоғистон Республикаси Президенти ва БРИКС+ саммитининг бошқа иштирокчилари биргаликда суратга тушишди.