Қозоғистон 14,3 триллион тенгега тенг 17 та юқори қийматли лойиҳани амалга оширмоқда
ASTANA. Kazinform – Бу лойиҳалар тўлиқ ишга тушгач, 24,6 мингдан зиёд иш ўрни яратилади.
"Мамлакатда саноат корхоналарини қўллаб-қувватлаш мақсадида 16 та махсус иқтисодий зона (МИЗ) ва 55 та индустриал зона (ИЗ) фаолият юритмоқда. Уларда умумий қиймати 15 триллион тенгеден ортиқ маҳсулот ишлаб чиқарилган ва 48,6 мингдан зиёд иш ўрни яратилган. Капитал талаб қиладиган ва юқори қўшимча қийматга эга ишлаб чиқаришларни рағбатлантириш мақсадида 2024 йилдан бошлаб инвестиция ҳажми қанча катта бўлса, имтиёзлар шунча кўп бўладиган дифференциалланган ёндашув жорий этилди”, – дейилади Олжас Бектеновнинг депутатлик сўровига берган жавобида.
Унинг сўзларига кўра, МИЗ ва ИЗларда лойиҳаларни танлаш учун янги мезонлар жорий этилаётган бўлиб, асосий эътибор ўрта ва юқори қайта ишлаш, экспортбоп маҳсулот ишлаб чиқариш ҳамда импорт ўрнини босишга қаратилади.
“Иқтисодиётни янада диверсификация қилиш ва чуқур қайта ишлашни ривожлантириш мақсадида умумий инвестиция ҳажми 14,3 триллион тенгеден зиёд бўлган юқори қайта ишлаш даражасига эга 17 та йирик кластер лойиҳаси амалга оширилмоқда. Ушбу лойиҳалар тўлиқ қувват билан ишга тушгач, 24,6 мингдан зиёд иш ўрни яратилади, экспорт 6 триллион тенгега ошади, импортни бартараф этиш эса йилига 1,5 триллион тенгени ташкил этади. Ушбу лойиҳалар атрофида кластер тизими ривожланади ҳамда кичик ва ўрта бизнес иштирокида компонентлар ишлаб чиқариш йўлга қўйилади”, – деди ҚР Ҳукумати раҳбари.
Олжас Бектенов маълумотларига кўра:
- «KAZ Minerals Smelting» МЧЖнинг мис эритиш заводи ва «Mineral Product International» МЧЖнинг ферроқотишмалар заводи доирасида ҳозирда экспорт қилинаётган барча хомашё ички бозорда қайта ишлашга йўналтирилади;
- «KIA Qazaqstan» ва «Astana Motors Manufacturing Kazakhstan» МЧЖлари доирасида янги автомобиль заводлари қурилмоқда, шу билан бирга янги ишлаб чиқариш занжири шаклланмоқда;
- 2024 йил июлида Сарань шаҳрида Tengri Tyres автошиналар заводи ишга туширилди;
- 2023 йил октябрида Алмати шаҳрида Kazakhstan Mobility Engineering компаниясининг мультимедиа тизимлари ишлаб чиқариш заводи иш бошлади;
- Жорий йилда Алматида Almaty Autoparts Production автоўриндиқлар ишлаб чиқариш заводи фаолият бошлади;
- «Вектор Павлодар» МЧЖда алюминий дисклар ишлаб чиқариш йўлга қўйилди;
- «Qarmet» комбинатида эса автомобиль саноати учун махсус пўлат ишлаб чиқарилади.
