Коронавирус: Буюк Британияда баҳордаги каби локдаун жорий этилмоқда

LONDON. Kazinform - Борис Джонсон Англияда юқтирганлар сонининг муттасил ўсиб бориши сабабли эпидемиологик чоралар кучайтирилганлигини эълон қилди, деб хабар беради Kazinform ВВСга асосланиб.

Буюк Британия Бош вазири Борис Джонсон мамлакатда бугундан жорий этиладиган янги чеклов чораларини эълон қилди.

Англияда янги қоидаларга кўра:

Март ойидаги локдаун каби, одамлар уйдан чиқишига рухсат этилмайди, фавқулодда вазиятларгина бундан мустасно.

Фавқулодда вазиятларга тиббий эҳтиёжлар, озиқ-овқат маҳсулотларини харид қилиш, спорт билан шуғулланиш ва уйда ишлай олмайдиганлар учун иш жойига бориш киради.

Сешанба кунидан бошлаб барча мактаблар ва коллежлар (камдан-кам ҳолатлардан ташқари) феврал таътилигача масофадан ўқитишга ўтадилар.

Мактабгача ёшдаги болалар учун муассасалар, масалан, болалар боғчалари очиқ бўлади.

Йиллик имтиҳонлар кейинги ёзда бекор қилинади (ёки махсус қоидаларга мувофиқ ўтказилади).

Университет талабалари таътилдан талабалар шаҳарчасига қайтишмайди ва масофадан туриб ўқишни давом эттиришади.

Голф майдончалари, теннис кортлари ва очиқ спорт майдончалари каби очиқ спорт иншоотлари ёпиқ бўлади.

Ҳаваскор спортчилар учун тадбирлар тўхтатилади, аммо профессионал спортчиларга, шу жумладан Премер-лигага ўйнашга рухсат берилади.

Бош вазирнинг сўзларига кўра, февраль ойининг ўрталарида тўртта устувор гуруҳнинг барча аъзолари (шу жумладан, қариялар уйида яшовчилар ва ушбу муассасалар ходимлари, 70 ёшдан ошган одамлар ва тиббиёт ходимлари) эмлашнинг биринчи дозасини олишади.

Расмийларнинг таъкидлашича, бу юқори хавфли гуруҳларни ҳимоя қилади ва шу билан бир қатор чекловларни олиб ташлашга ёрдам беради.

Буюк Британияда кетма-кет еттинчи куни ҳар куни 50 мингдан ортиқ янги ҳолатлар рўйхатга олинмоқда, кеча эса 58 минг ҳолат қайд этилди. Душанба куни биргина Британия шифохоналарида 26000дан ортиқ коронавирус билан касалланган беморлар бўлган.