Колумбиянинг собиқ президенти 12 йиллик уй қамоғига ҳукм қилинди

ASTANA. Kazinform – Колумбиянинг собиқ президенти Альваро Урибе гувоҳларга босим ўтказиш ва фирибгарлик ҳаракатлари учун 12 йиллик уй қамоғига ҳукм қилинди, деб хабар беради BBC.

73 ёшли сиёсатчи мамлакат тарихида жиноят учун судланган илк собиқ президентга айланди. Суд унга давлат хизматларида ишлаш тақиқини жорий қилди ва 578 минг АҚШ доллари миқдорида жарима солди.

Айбсиз эканини таъкидлаган Урибе Боготада бўлиб ўтган суд мажлисида ҳукм устидан шикоят беришини билдирди. Унинг сўзларига кўра, бу иш “демократик мухолифат овозини ўчиришга қаратилган”.

Альваро Урибе 2002 йилдан 2010 йилгача Колумбия президенти лавозимида фаолият юритган. Унга чап қанот исёнчиларига қарши курашда ўнг қанот қуролли гуруҳлар билан алоқада бўлгани ҳақида айбловлар қўйилган, бироқ у бу даъволарни қатъий рад этади. Шунга қарамай, у Колумбияда ҳануз машҳур сиёсатчи ҳисобланади.

Собиқ президент тахминан 13 йил давом этган тергов жараёнида гувоҳларга босим ўтказишга доир икки модда бўйича айбдор деб топилди.