Кобулдаги терактда Толибон вазири ҳалок бўлди

ASTANA. Kazinform – Афғонистондаги “Толибон” муваққат ҳукуматининг қочқинлар ишлари бўйича вазири Халил ур-Раҳмон Ҳаққоний Кобулдаги масжид олдидаги терактда ҳалок бўлди. Бу ҳақда CNN хабар берди.

Қайд этилишича, худкуш Ҳаққоний ҳужжатлар имзолаётган пайтда ўзини портлатган. Толибон вакили билан бирга яна 6 киши ҳалок бўлган.

“Афғонистоннинг қочқинлар ишлари бўйича вазири Халил ур-Раҳмон Ҳаққонийнинг худкушлик ҳужуми оқибатида ҳалок бўлгани ҳақидаги маълумот тасдиқланди”, – дейилади хабарда.

Ҳаққоний Афғонистонда Толибон ҳокимиятга қайтганидан бери портлашда ҳалок бўлган энг юқори мартабали амалдор эди. 2021 йил сентябрь ойида у Афғонистоннинг қочқинлар ишлари бўйича вазири этиб тайинланди.