Қирғизистонликлар қишда электр тақчиллигига дуч келиши мумкин
Ҳукумат раҳбари қирғиз халқига мурожаатида энергетика соҳасида муаммо борлигини тан олди ва мамлакат фуқароларини электр энергиясини тежашга ва сабрли бўлишга чақирди.
«Биз дарёларнинг юқори оқимида жойлашган бўлсак-да, қишда электр энергиясини бошқа давлатлардан импорт қиламиз. Биз пулга сотиб оламиз. Шунинг учун ҳам мен янги сув электр станцияси (СЭС) қурилишини тезроқ бошлашни таклиф қилдим ва тез орада биринчи СЭС агрегати «Қамбар Ата-2» қурилди. Бу Совет Иттифоқи тарқаганидан кейин қурилган биринчи СЭС эди. 2020 йилгача мамлакатда бошқа СЭСлар қурилмаган. Ҳозирги вақтда мамлакат ва аҳолида электр энергиясидан фойдаланиш эҳтиёжи икки баравар кўпайди. Худога шукур, 2020 йилда ҳокимиятга келган президент Садир Жапаров бу муаммони дарров сезди. Ҳукуматнинг биринчи йиғилишида иккита асосий вазифа қўйилди: СЭС қурилишини тезроқ бошлаш, кейин эса темир йўл қурилишини жонлантириш. Ҳозир элликка яқин кичик ва ўрта СЭС, шунингдек, аср қурилиши дейиш мумкин бўлган «Қамбар Ата» СЭСи қурилмоқда», – деб ёзади Вазирлар Маҳкамаси раҳбари.
Ақилбек Жапаров энергетика соҳасидаги вазиятни тушунтирар экан, барча СЭС қурилишини якунлаш учун вақт керак, бироқ улар қурилиб, ишга туширилгач, Қирғизистон электр энергияси тақчиллигини бартараф этиб, экспорт қилувчи давлатга айланишини таъкидлади.
Қирғизистон Республикаси Вазирлар Маҳкамаси раиси дарёларда сув сатҳининг камайиши муносабати билан келаётган қишда мамлакатда электр энергияси тақчиллиги юзага келишини маълум қилди. Аҳолини сабрли бўлишга ва келгуси уч йил ичида электр энергиясини тежашга чақирди.
«СЭС қурилиши вақт, эътибор ва куч талаб этади. Энди қўшниларимиз орқали Россия, Туркманистондан электр энергиясини импорт қиламиз. Бироқ бу йил қишда Қозоғистон ва Ўзбекистон электр қуввати тақчиллиги туфайли электр энергиясини транзит қила олмайди. Уларнинг ўзларига етмаяпти. Шу боис, азиз юртдошлар, ҳозирги ҳукуматни тушуниб, шу дақиқадан бошлаб электр энергиясини тежайсиз, деган умиддамиз. Қирғизистон 2020 йилгача қишда электр энергиясини қўшни давлатлардан нақд пулга сотиб оларди. Ёзда эса қўшни давлатларга суғориш учун сув жўнатади (халқаро стандартларга кўра, баландликда жойлашган мамлакатлар қуйида жойлашган мамлакатларга сув юборишга мажбурдир). Садир Жапаровнинг музокаралари туфайли қишда қўшни давлатлардан электр энергияси олиб, ёзда қайтарамиз. Биз сувни исроф қилмаймиз, уни фильтрдан ўтказамиз ва ундан қўшни давлатлардан оладиган электр энергиясини қишда қоплаш учун ишлатамиз. Биз 2020 йилдан буён шу йўл билан ишлаяпмиз ва давлат маблағини тежаяпмиз. Юртимизда тинчлик ва барқарорлик бўлса, ҳаммаси яхши бўлади. Қирғизистон яхлитлигини бузишни мақсад қилган учинчи кучлар йўқ. Биз, ҳокимият вакиллари, қўл қовуштириб ўтирмаймиз. Кечаю кундуз кузатиб, СЭС қурилиши устида ишлаяпмиз. Худо куч берса ҳаммаси яхши бўлади. Сизга керак бўлган нарса - сабр. Келинг, қишга тайёрланайлик!«– дейилади Ақилбек Жапаровнинг қирғиз халқига мурожаатида.
Муаллиф: Гульмира Абдрахманова
