Қирғизистонда янги вазирлик ва давлат агентлиги ташкил этилди

BISHKEK. Kazinform – Қирғизистонда Президент фармони билан Вазирлар кабинети тузилмасига ўзгартиришлар киритилди, унга кўра Қурилиш, архитектура ва уй-жой коммунал хўжалиги вазирлиги ҳамда Жисмоний тарбия ва спорт давлат агентлиги ташкил этилди.

Президент матбуот хизмати хабарига кўра, архитектура, қурилиш ва уй-жой коммунал соҳасини самарали ривожлантириш, уларнинг иқтисодиётнинг бошқа тармоқлари билан ўзаро алоқадорлиги муҳимлигини инобатга олган ҳолда, Вазирлар кабинети ҳузуридаги Архитектура, қурилиш ва уй-жой коммунал хўжалиги давлат агентлиги негизида Қирғизистон Республикаси Архитектура, қурилиш, уй-жой коммунал хўжалиги вазирлигини ташкил этиш тўғрисида қарор қабул қилинди.

Қирғизистон Республикаси Вазирлар кабинети ҳузуридаги Жисмоний тарбия ва спорт давлат агентлиги Қирғизистон Республикаси Маданият, ахборот, спорт ва ёшлар сиёсати вазирлиги ҳузуридаги Жисмоний тарбия ва спорт департаменти негизида жисмоний тарбия ва спорт соҳасидаги ривожланиш ролини ошириш мақсадида яратишга қарор қилинди.

“Жисмоний тарбия ва спорт масалалари бўйича мустақил давлат органининг ташкил этилиши ушбу соҳани самарали ривожлантириш учун ваколат ва ресурсларни бирлаштириш, дастурларнинг узлуксизлигини таъминлаш, спорт инфратузилмасини ривожлантириш, шунингдек, халқаро миқёсда ушбу соҳадаги мамлакат манфаатларини муносиб ифодалашни таъминлаш имконини беради”, – дейилади хабарда.

Бунгача Жисмоний тарбия ва спорт бошқармаси Қирғизистон Республикаси Маданият, ахборот, спорт ва ёшлар сиёсати вазирлиги тасарруфида эди.