Қирғизистон Президенти «Барселона» юлдузларига қарши майдонга чиқди

BISHKEK. Кazinform – Бишкекда «Барселона» ва Осиё афсоналари ўртасида футбол бўйича ўртоқлик учрашуви бўлиб ўтди, деб хабар беради Кazinform мухбири.

«Осиё афсоналари» жамоаси таркибида Қирғизистон Президенти Садир Жапаров, қозоғистонлик фахрийлар Давид Лория, Самат Смаков, Андрей Карпович, Игорь Авдеев, қирғизистонлик Руслан Сидиқов, ўзбекистонлик Сервер Жепаров, Бахтиёр Ашурматов, Леонид Кошелев, эронлик Ходадад Азизи ва БААдан Башир Саид бўлди.

«Барселона»нинг асосий таркиблари қуйидагича эди: Ангой Хесус, Джулиано Беллетти, Эдгар Давидс, Карлес Пуйоль, Роберто Трасоррас, Хавьер Савиола, Людовик Жюли, Джовани Дос Сантос, Ривалдо, Серхи Бархуан ва Хуан Пабло Сорин.

Ўйин бошланиши олдидан Қирғизистон Президенти табрик сўзи билан чиқди. У барча қирғизистонликларни Мустақиллик байрами билан табриклади, шунингдек, Жалолободда очилган янги «Барселона» академияси келажакда футбол юлдузларини етиштириши мумкинлигини таъкидлади.

Қирғизистон Республикаси раҳбари Бишкекдаги ўша футбол клуби академияси қурилишига капсула қўйганини ҳам айтди.

Ўйин Долон Омурзоқов номидаги стадионда бўлиб ўтди, унда минглаб футбол ишқибозлари, жумладан, қозоғистонликлар ҳам йиғилди. Унинг натижаларига кўра «каталонияликлар» ғолиб бўлишди. Улар рақиб дарвозасига жавобсиз учта гол уришди. Гол муаллифлари: Джовани Дос Сантос, Хуан Пабло Сорин ва Хавьер Савиола.

Учрашувни маҳаллий ҳакамлар Равшан Ирматов, Бахадир Кочкаров, Абдухамидулло Расулов, Санжар Жақипбеков ва Риспек Шекербековлар бошқариб боришди.

Эслатиб ўтамиз, 29 август куни Жалолободда Испаниянинг «Барселона» клубининг МДҲ мамлакатларида биринчи ва 29-футбол академиясининг тантанали очилиш маросими бўлиб ўтди. Очилиш маросимида Қирғизистон Президенти Садир Жапаров, Испаниянинг «Барселона» клуби президенти Жоан Лапорта бошчилигидаги вакиллар, шунингдек, давлатнинг бошқа юқори лавозимли амалдорлари иштирок этишди.

Муаллиф: Еламан Турисбеков