Қирғизистон фуқароларига АҚШга кириш тақиқланиши мумкин
BISHKEK. Kazinform – Дональд Трамп маъмурияти яна 36 та давлат, жумладан Қирғизистон фуқароларининг АҚШга киришига чеклов қўйишни кўриб чиқмоқда. Бу ҳақда Washington Post нашри хабар берди.
АҚШ визаси берилишига тўсқинлик ёки бошқа чекловлар жорий этилиши мумкин бўлган давлатлар рўйхатига қуйидагилар кирган: Ангола, Антигуа ва Барбуда, Бенин, Бутан, Буркина-Фасо, Кабо-Верде, Камбожа, Камерун, Конго Демократик Республикаси, Жибути, Доминика, Эфиопия, Миср, Габон, Гамбия, Гана, Қирғизистон, Либерия, Малави, Мавритания, Нигер, Нигерия, Сент-Китс ва Невис, Сент-Люсия, Сан-Томе ва Принсипи, Сенегал, Жанубий Судан, Сурия, Танзания, Тонга, Тувалу, Уганда, Вануату, Замбия ва Зимбабве.
Бу ҳужжатга АҚШ Давлат котиби Марко Рубио 14 июнь куни имзо чеккан ва ундаги маълумотлар ушбу давлатлар билан ишловчи америка дипломатик миссияларига юборилган. Ҳужжатда қайд этилишича, номзод давлатларга АҚШ Давлат департаменти томонидан белгиланган янги талаб ва кўрсаткичларни бажариш учун 60 кун муҳлат берилган.
Хатда айтилишича, Трамп маъмурияти мамлакатларнинг мазкур кўрсаткичларни бажариш-бажармаслигини баҳолаш асосида ушбу рўйхатни тузган.
Қирғизистон Ташқи ишлар вазирлиги бу ҳолат юзасидан расмий изоҳ сўраб, АҚШнинг Қирғиз Республикасидаги элчихонаси консулини тушунтириш учун чақирган.
“Айни пайтда АҚШда хавфсизликни таъминлаш ва хорижий фуқароларнинг киришини тартибга солишга қаратилган миграция қонунчилигини қайта кўриб чиқиш жараёни давом этмоқда. Ҳозирча Қирғизистон фуқаролари учун қандайдир расмий чекловлар жорий этилгани тўғрисида америка томонидан расмий маълумот келиб тушгани йўқ. Бироқ Washington Post нашрида қайд этилган рўйхат қандай мезонлар асосида тузилгани ҳамон ноаниқ бўлиб қолмоқда”, – дейилади Қирғизистон ТИВ хабарида.
