КХШТ Бош котиби референдумда овоз берди

MOSKVA. Kazinform - Қозоғистонда АЭС қуриш бўйича референдумда Коллектив хавфсизлик шартномаси ташкилоти (КХШТ) Бош котиби Иманғали Тасмағамбетов Қозоғистоннинг Москвадаги Элчихонаси биносида жойлашган 397-сайлов участкасида овоз берди, деб хабар беради Кazinform агентлиги мухбири.

Эслатиб ўтамиз, Москвада овоз бериш маҳаллий вақт билан соат 07:00да (Астана вақти билан 09:00) бошланди ва 20:00 да тугайди.

Қўшни давлат пойтахтида жойлашган барча қозоғистонликлар ушбу ҳудуддаги АЭС бўйича ўз хоҳиш-иродасини билдириши мумкин бўлади.

Умуман олганда, Россия ҳудудида Қозоғистон Республикасининг Москвадаги Элчихонаси, шунингдек, Қозоғистон Республикасининг Санкт-Петербург, Қозон, Омск ва Астрахандаги Бош консулликларида сайлов участкалари очилди.

Аввалроқ Бош вазир Олжас Бектенов Қозоғистонда АЭС қуриш бўйича умумхалқ референдумида иштирок этган эди. Ҳукумат раҳбари Ал-Форобий номидаги Ўқувчилар саройида жойлашган 61-сайлов участкасида овоз берди.

Энергетика вазири Алмасадам Сатқалиев 230-сайлов участкасида овоз берди.

— Умуман олганда, йил давомида анчагина ишлар амалга оширилди. Ҳудудларга сафарлар уюштирилди. Энергетика вазирлиги томонидан эксперт ёрдами кўрсатилди, — деди у.

Қозоғистон Республикаси Маданият ва ахборот вазири Аида Балаева 164-сайлов участкасида овоз берди.

- Бу жуда жиддий кампания, унда халқ учун муҳим қарор қабул қилинмоқда. Албатта, АЭС қуриш бўйича бугунги референдум сиёсий бўлмаган масала бўлиб, у соф иқтисодий моҳиятга эга, аммо бу мамлакатимиз тараққиётига жуда жиддий ва зўр таъсир кўрсатади. Шу боис, бу масалага жуда жиддий ёндашиш муҳим, мен ушбу республика фуқароси сифатида сайлов участкасига катта масъулият билан келдим ва ўз овозимни бердим. Ўйлайманки, мамлакатнинг барча фуқаролари ҳам референдумга масъулият билан ёндашади, — деди вазир.

Муаллиф: Қ. Боқаева