Кейинги 4 йилда ўқитувчиларнинг маоши икки баравар ошди

ҚР Таълим-маориф вазири Ғани Бейсембаев
Фото: primeminister.kz

ҚР Таълим-маориф вазири Ғани Бейсембаев ўқитувчиларни Устозлар куни байрами билан табриклади, дея хабар беради Kazinform вазирлик матбуот хизматига таяниб.

“Сизларни миллий байрамимиз – Ўқитувчилар куни билан чин қалбимдан табриклайман!

Юртимиздаги миллионлаб ёшлар сизлардан яхши таълим, маънавий-ахлоқий тарбия олиб, буюк ҳаёт сари қадам ташлайди. Сизларнинг меҳнатларингиз, сабр-тоқатларингиз ва садоқатларингиз туфайли келажак авлод пойдевори шаклланади.

Сизларга катта ҳурмат билан чин дилдан миннатдорчилик билдираман. Ўқувчиларига бор билимларни бериб, улар қалбида меҳнатсеварлик, одоб-ахлоқ, саховатпешалик, она-Ватанга муҳаббат туйғуларини сингдириб, шахс камолотининг бошида турган сизларсиз. Ҳурматли ҳамкасблар, бу муҳим ва машаққатли йўлда ҳал қилувчи роль сизларга тегишли!

Бу йил биринчи марта ўқитувчиларнинг касб байрами – Ўқитувчилар куни 5 октябрга белгиланди. Бу байрам энг олижаноб, масъулиятли ва муҳим касб эгаларини ўзида жамлаши шубҳасиз.

Бугунги кунда мамлакатимизда мактабгача таълим, ўрта, техник ва касб-ҳунар таълими соҳасида 500 мингга яқин педагог меҳнат қилади. Давлат раҳбари кўмагида 2019 йилда энг муҳим масалалардан бири сифатида ўқитувчилик касбига алоҳида мақом бериш қарори қабул қилинди”, - деди Ғани Бейсембаев.

Шунингдек, у ўқитувчиларнинг иш ҳақи тўрт йил ичида икки баробарга ошганини таъкидлади. 2023 йил 1 январдан ўқитувчиларнинг иш ҳақи яна 25 фоизга оширилди. Бугунги кунда 220 минг нафарга яқин ўқитувчига тайинланган тоифасига кўра 50 фоизгача устама тўланади. Жорий йил сентябрь ойидан бошлаб мактабгача таълим муассасаларида фаолият юритаётган 97 минг нафар ўқитувчининг маоши яна 30 фоизга ошди. Бундан ташқари, жорий йилда илк бор 90 минг нафардан ортиқ ўқитувчи малака ошириш курсларидан ўтди.

“Ўқитувчиларни аттестациядан ўтказиш жараёни такомиллаштириб бориляпти. Таълим тизимининг узлуксиз ривожланиши учун максимал шароит яратишимиз керак. Ҳар бир ўқитувчининг меҳнати шогирдларининг муваффақияти билан баҳоланиши керак, деб ҳисоблаймиз. Бунинг учун миллий платформа асосида педагог кадрларни аттестациядан ўтказишни автоматлаштириш ишлари олиб борилмоқда. Бу объектив ва шаффоф бўлиши керак. Педагогика ва ўқитиш методикаси бўйича тест синовлари чиқариб ташланди. Ўқитувчининг касбий малакаси фақат модератор ва ўз фанининг мутахассисига айлангандагина баҳоланади”, - дейилади хабарда.

Шунингдек, мамлакатнинг энг яхши педагоглари “Таълимдаги ўзгаришларнинг 1000 нафар етакчиси” республика кадрлар захирасига қабул қилиниши мумкинлиги ҳам қайд этилган. Энг кучлилари эса “Болашақ” дастури бўйича хорижий стажировкага юборилади.

Таълим соҳаси ривожига, мустақил юрт таянчи бўладиган ёш авлод тарбиясига беқиёс ҳисса қўшган фахрий устозлар олдида минг таъзим. Сизларнинг бебаҳо тажриба ва билимларингиз ёш ўқитувчиларга ўрнакдир.

Ҳаким Абайша айтганидек, “Устозлик қилган зерикмас!”. Бинобарин, биз ҳозирги устоз қиёфасини халқ улуғлаб келаётган “Устознинг ўрни – тур” сиймосига кўтариш ва замонавийлаштиришга мажбурмиз. Шу мақсадда вазирлик томонидан таълим соҳасида 30 ва ундан ортиқ йил меҳнат қилган ўқитувчиларни «Еңбек ардагері» медали билан тақдирлаш тўғрисида қарор қабул қилинди. Биринчи марта Республика педагогика ходимлари фахрийлар Кенгаши ташкил этилди. Бундай Кенгашлар мамлакатнинг ҳар бир ҳудудида ташкил этилган.

Ишончим комилки, бу чора-тадбирлар сизларнинг меҳнат қилишингиз, касбий маҳоратингизни оширишингиз учун қулай шарт-шароит яратади, фарзандларимизнинг таълим сифатини оширади.

Қадрли ҳамкасблар!

Бизга бутун жамиятнинг тарбиявий миссияси ишониб топширилган. Биз, ўқитувчилар, онгли ва бағрикенг замонавий авлодни шакллантириш, мамлакатимизнинг ижобий қиёфасини юксалтиришнинг ҳаракатлантирувчи кучига айланишимиз керак.

“Мактаб шунчаки таълим муассасаси эмас, бу болалар ҳаётнинг энг муҳим қадриятларини ўрганадиган жой. Улар юксак маданият, ватанпарварлик, меҳнатсеварликка сингиб, ўз юртига бўлган шукроналикларини англай олишлари керак. Бунинг учун биз устозлар ўз фикримизни ўзгартириб, донишманд ва олижаноб, эзгулик ва бунёдкорлик аҳли бўлишимиз керак. Ёш авлод тарбиясидаги машаққатли меҳнатингиз, касбингизга содиқлигингиз учун сизга чин қалбимдан миннатдорчилик билдираман!

Сизларга мустаҳкам соғлик, тинимсиз куч ва меҳнатингиз самарасини тилайман! Устозлар куни муборак!”, - деди вазир.

Сўнгги хабарлар