Келгуси икки йилда Қозоғистонда 200 та ёрдамчи мактаблар тармоғи яратилади
ASTANA. Kazinform – Яқин икки йилда 200 та ёрдамчи мактаблар тармоғи яратилади. Бу ҳақда ҚР Бош вазири ўринбосари Тамара Дуйсенова WALS 2024 халқаро конференциясининг очилиш маросимида маълум қилди.
“Бир неча йилдирки, Назарбаев интеллектуал мактаблари, Таълим ва инновациялар лицейи каби етакчи мактабларимиз тажрибасини оммалаштириш орқали мамлакатимизнинг қишлоқ жойларида кўмак мактабларини ташкил этиш лойиҳаси амалга оширилмоқда. Келгуси 2 йил ичида шу лойиҳа ҳисобидан 200 та ёрдамчи мактаблар тармоғини яратиш режалаштирилган. Келгусида бу мактаблар ўз тажрибаларини республикамиздаги бошқа қишлоқ мактаблари билан бўлишади. Шу муносабат билан Lesson Study ёндашуви кўламини кенгайтириш биз учун долзарб вазифа ва таълим сифатини тизимли равишда оширишнинг асосий шартидир. Ҳозирда ҳам бу ёндашув республикамиздаги педагог кадрлар малакасини ошириш таълим дастурига киритилган кафедралардан бири ҳисобланади. Бу Қозоғистон мактабларида Lesson Study амалиётининг кенг тарқалишига ва буни ўқитувчилар томонидан чуқурроқ эътироф этилишига хизмат қилади”, – деди Тамара Дуйсенова.
“Назарбаев интеллектуал мактаблари” мустақил таълим ташкилоти “Педагогик маҳорат маркази” фаол фаолияти натижасида Lesson Study усули Қозоғистон мактабларида муваффақиятли қўлланилаяпти, дея таъкидлади вице-президент.
“Марказ 10 йилдан ортиқ вақт давомида республика ўқитувчилари ўртасида Lesson Study усулини фаол тарғиб этиб келмоқда. Бугунги халқаро конференцияда Қозоғистондан 500 га яқин ўқитувчилар иштирок этди ва улардан 280 нафари конференция доирасида муваффақиятли сараланган илмий тезисларини тақдим этдилар. Бу ўқитувчиларимиз томонидан Lesson Study усули муваффақиятли татбиқ этилаётганининг ёрқин далили, деб ўйлайман. Айни пайтда Педагогика маҳорати маркази Озарбайжон, Қирғизистон, Малави, Туркманистон, Тожикистон, Россия Федерацияси ўқитувчилари ўртасида Lesson Study ғояларини тарғиб қилиш бўйича катта ишларни бошлаб юборди. Тез орада бу рўйхатга бошқа давлатлар ҳам қўшилади, деган умиддамиз”, – деди Бош вазир ўринбосари.
Эслатиб ўтамиз, “Lesson Study: энг яхши ўрганиш ва ўқитишга интилиш” мавзусида ўтказилаётган WALS-2024 конференциясига дунёнинг 30 га яқин давлатидан мутахассислар келган.
Асосий маърузачилар орасида жаҳон таълимининг энг обрўли мутахассислари бор: Норвегиядан Ойстейн Кристиансен, Литвадан Дариус Радкевичюс, Буюк Британиядан Сара Селезнев, Япониядан Ширли Тан, Германиядан Клара Кагер келган.
Умуман олганда, тадбирда 850 дан ортиқ киши иштирок этмоқда.
