Kazsat ва Oneweb сунъий йўлдошлари Starlink ўрнини босиши мумкин
ASTANA. Kazinform – ҚР Рақамли ривожланиш, инновациялар ва аэрокосмик саноат вазирлиги Илон Маскнинг интернет сунъий йўлдошига қўйилган чекловлар сабабларини тушунтирди ва вазирлик томонидан қандай муқобил вариантлар таклиф этилганини айтди.
Ўтган йилнинг охирида ҚР Рақамли ривожланиш вазирлиги Thuraya, Iridium, Inmarsat ва Starlink сунъий йўлдош алоқа тизимларини етказиб бериш ва улардан фойдаланишни тақиқлаш тўғрисидаги буйруқ лойиҳасини эълон қилди.
Шу муносабат билан агентлик томонидан юборилган расмий сўровга жавоб берган вазирлик кўрилган чоралар миллий хавфсизликка таҳдид билан боғлиқлигини даъво қилмоқда. Негаки, Қозоғистон қонунчилигига кўра, хориждан бошқариладиган алоқа тармоғидан фойдаланиш тақиқланган.
Starlink ўрнини ким эгаллайди?
Қозоғистон хорижий сунъий йўлдош тизимининг чекловлари туфайли муқобил вариантларни кўриб чиқмоқда.
“Қозоғистон ҳудудида маҳаллий «KazSat» сунъий йўлдош тармоғи ва алоқани бошқариш марказини қурган халқаро OneWeb компанияси чекка ҳудудларни алоқа билан таъминлаш муаммосини ҳал қилишнинг муқобил варианти сифатида кўриб чиқилмоқда. Биринчи лойиҳа доирасида қишлоқ мактабларини интернет билан таъминлаш учун Starlink технологиясидан фойдаланиш ташкил этилди”, – деб хабар қилди ҚР Рақамли ривожланиш вазирлигининг Телекоммуникациялар қўмитаси.
Бундан ташқари, вазирлик Amazon Kuiper Commercial Services LLC компанияси билан космик технологиялар ва сунъий йўлдош алоқаси соҳасида ҳамкорлик қилиш бўйича меморандум имзолади. Қозоғистонда бошқарув марказини қуриш бўйича Хитойнинг Shanghai Spacecom Satellite Technology Co., Ltd компанияси билан музокаралар олиб борилмоқда.
“Бундан ташқари, Қозоғистон Республикаси Ҳукумати томонидан “Арзон интернет” миллий лойиҳаси тасдиқланганини таъкидлаймиз. Унинг доирасида аҳолини интернет тармоғидан фойдаланишни таъминлаш учун зарур инфратузилмани барпо этиш кўзда тутилган”, – дейилади вазирлик жавобида.
