Қасим-Жомарт Тоқаев Пекинда Транскаспий транспорт коридорининг аҳамияти ҳақида гапирди

Тоқаев
Фото: Ақорда

Қозоғистон Президенти Қасим-Жомарт Тоқаев Пекинда бўлиб ўтаётган “Бир макон, бир йўл” III юқори даражадаги форумида Транскаспий халқаро транспорт йўналишининг ўзига хос ўрнига эътибор қаратди, деб хабар беради Kazinform агентлиги.

Бу йўналиш Хитой, Марказий Осиё ва Европани боғловчи “Бир макон, бир йўл” ташаббусининг қуруқликдаги кўпригига айланиши мумкин. Шу билан бирга, бу юк ташиш вақтини икки баравар қисқартиришга ва транспорт харажатларини сезиларли даражада камайтиришга ёрдам беради.

“Қозоғистон ва Хитой Транскаспий йўналишини ривожлантириш бўйича иккита ҳукуматлараро битим имзолади. Ишончим комилки, бу келишувлар яқин келажакда салмоқли натижалар беради. Саъй-ҳаракатларимизни янада самарали мувофиқлаштириш учун йирик стратегик портлар, логистика марказлари ва почта марказларидан иборат ҳамкорлик тармоғини яратишни таклиф қиламан. Қўшма кема ва контейнерлар ишлаб чиқаришни йўлга қўйишдан ҳам манфаатдормиз. Қозоғистон доимий йўловчи ва юк ташишни таъминловчи жаҳоннинг етакчи авиакомпаниялари учун ишончли ҳаво кўприги ва қулай бандаргоҳ бўлишга тайёр”, — деди Қасим-Жомарт Тоқаев.

Давлат раҳбари таъкидлаганидек, янги глобал лойиҳа сифатида эътироф этилган “Рақамли ипак йўли” ташаббуси доирасидаги ҳамкорлик кўплаб имкониятларга йўл очмоқда.

“Рақамли ва интеллектуал интеграциянинг янги моделини яратиш иқтисодиётимизнинг инновацион ривожланишига катта ҳисса қўшишига ишонаман. “Бир макон, бир йўл” ташаббусининг янги ўн йиллигида Қозоғистон умумий муваффақиятларга эришишда ҳар томонлама иштирокини давом эттиради. Ҳурматли раис Си Цзиньпин, ишончим комилки, Хитой Халқ Республикаси Сизнинг доно раҳбарлигингиз остида турли халқларнинг умумий тарихий тақдири концепцияси асосида Хитойнинг янги даврини шакллантиришда улкан муваффақиятларга эришади”, — деди Қасим-Жомарт Тоқаев.

Форумда Хитой раҳбари Си Цзиньпин, Россия Президенти Владимир Путин, Индонезия Президенти Жоко Видодо, Аргентина Президенти Альберто Фернандес, Эфиопия Бош вазири Абий Аҳмад, БМТ Бош котиби Антониу Гутерришлар ҳам сўзга чиқди. Тадбирда 20 дан ортиқ давлат раҳбарлари, 130 дан ортиқ давлат ва халқаро ташкилотлар вакиллари иштирок этмоқда.

Сўнгги хабарлар