Қасим-Жомарт Тоқаев Хорижий инвесторлар кенгашининг навбатдан ташқари йиғилишида иштирок этди
Йиғилиш иштирокчилари инсон капиталини мустаҳкамлаш, иқтисодиёт ва сармоявий сиёсатга экологик, ижтимоий ва корпоратив бошқарув стандартларини жорий этишни таъкидлаб, мамлакатнинг сармоявий жозибадорлигини ошириш бўйича қатор таклифлар билдирди.
Президент фожиали январ воқеаларига тўхталар экан, ўз вақтида қабул қилинган дадил қарорлар туфайли мамлакатимизда вазият тўлиқ барқарорлашганини таъкидлади.
Қасим-Жомарт Тоқаевнинг таъкидлашича, тергов халқаро тамойилларга тўла мос равишда олиб борилмоқда. Президент январ воқеалари инвесторларга бироз ноқулайлик туғдирганини ҳам таъкидлади.
«Президент сифатида шуни айтмоқчиманки, хорижий инвесторлар учун «очиқ эшиклар» сиёсати бизнинг стратегик устувор вазифамиз бўлиб қолаверади. Давлат ҳамкорлар ва инвесторлар олдидаги мажбурият ва кафолатларини тўлиқ бажаради. Январ инқирози бозор иқтисодиётига, қонун устуворлигига, халқаро ва ички мажбуриятларга риоя қилишимизга таъсир қилмади. Аксинча, янада такомиллаштиришга янги туртки берди», – деди Президент.
Давлат раҳбари мамлакатни янада трансформация қилиш ғоясини илгари сурди. Қасим-Жомарт Тоқаев қонун устуворлиги ва унинг тенг қўлланилиши янги йўналишнинг асоси бўлишини таъкидлади.
«Бундан буён иқтисодий ислоҳотларнинг асосий вазифаси ялпи ички маҳсулот ўсиши ва жаҳон рейтингида мавҳум рақамлардан жой олиш эмас, балки халқимиз даромади ва турмуш сифатини ошириш бўлади. Албатта, янги тадбиркорлар гуруҳини шакллантирмасдан, юқори сифатли сармояларни жалб қилмасдан туриб, бу мақсадга эришиб бўлмайди. Бизнинг халққа, ҳалол тадбиркорликка, элитанинг алоҳида манфаатлари ва имтиёзларини, коррупция ва олигополияни йўқ қилиш бўйича берган ваъдаларимиз тўлиқ амалга ошади», - деди Қозоғистон Президенти.
Қасим-Жомарт Тоқаев барча халқаро рейтинг агентликлари мамлакатдаги инвестиция муҳити ишончлилигини мунтазам тасдиқлаб туришини таъкидлади. Президент таъкидлаганидек, январ ойидаги фожиали воқеаларга қарамай, мамлакат сиёсий ва иқтисодий тизими барқарорликни кўрсатди.
«Ишончим комилки, яқинда расмий эълон қилинган барча фактлар барча ҳаракатларимиз тўлиқ асосли эканлигини ва фақат мамлакатимиз яхлитлигини сақлаш, фуқароларимиз ҳаёти ва тадбиркорлик фаолиятимиз мулкини ҳимоя қилишга қаратилганини яққол исботлайди. Қозоғистонда анчадан бери ишлаб келаётган юртдошларимиз, ўйлайманки, буни сизлар яхши биласизлар. Ўша кунларнинг асл манзараси ҳақидаги ҳақиқат жуда муҳим», – деди Президентимиз.
Шу муносабат билан давлат раҳбари Хитой ва Россия Федерациясига яқинда амалга оширган ташрифларига тўхталиб ўтди.
«Бу давлатлар раҳбарлари билан жуда муваффақиятли музокаралар ўтказилди. Уларнинг барчаси асосан савдо-иқтисодий ва сармоявий ҳамкорликни мустаҳкамлашга қаратилган. Яна бир бор айтмоқчиманки, келишувлар жуда истиқболли», – деди Президент.
Давлат раҳбари инвесторлар эътиборини мамлакатимизнинг транспорт-логистика соҳасидаги салоҳиятига ҳам қаратиб, «Хитой-Европа» даҳлизи бўйича қуруқликдаги транзит юк ташиш ҳажмининг 83 фоизи Қозоғистон орқали ўтишини таъкидлади.
«Дўстлик – Мойнти» кенг кўламли темир йўл лойиҳаси амалга оширилмоқда. Бу ўтказиш қобилиятини 5 баробар оширади. «Дарбаза – Мақтарал» янги темир йўл линияси Марказий Осиёдан Россияга ва ундан кейин Европага транзит ташишни ривожлантиришга хизмат қилади. «Туркистон – Чимкент – Тошкент» тезюрар темир йўли қурилиши режалаштирилган», — деди Қасим-Жомарт Тоқаев.
Шунингдек, йиғилишда Иқтисодиёт вазири Алибек Қуантиров, Осиё тараққиёт банки, Европа тикланиш ва тараққиёт банки, Citigroup, EY, Exxon Mobil, Chevron, TotalEnergies, Shell, Eni S.p.A., CNPC, Cameco, ArcelorMittal, General Electric ва бошқа йирик халқаро молия институтлари ва корхона раҳбарлари иштирок этди.
