Ижтимоий қўллаб-қувватлаш чора-тадбирлари Қозоғистонда демографик вазиятни яхшилади

ATYRAU. Kazinform - Қозоғистон Республикаси Меҳнат ва аҳолини ижтимоий ҳимоя қилиш вазири Тамара Дуйсенова Атирау вилоятига иш сафари чоғида фахрийлар, аёллар, жумладан, кўп болали оналар, пенсионерлар ноҳукумат ташкилотлари вакиллари билан учрашув ўтказди. Бу ҳақда Kazinform вазирлик матбуот хизматига таяниб хабар беради.

«2021 йилда давлат бюджетидан 4,9 млн олувчига пенсия ва ижтимоий нафақалар тўлаш учун қарийб 4 трлн тенге йўналтирилди. Бу бутун мамлакат бюджетининг деярли тўртдан бир қисмини ташкил этди. 2021 йилда Атирау вилоятида пенсия ва нафақа олувчилар сони 193,5 минг кишини ёки вилоят умумий аҳолисининг 29,3 фоизини ташкил этди, тўловларнинг умумий миқдори 125,6 млрд тенгени ташкил этди», — деди Меҳнат вазири.

Унинг таъкидлашича, давлат томонидан кўрилаётган ижтимоий қўллаб-қувватлаш чора-тадбирлари мамлакатдаги демографик вазиятни яхшилашга хизмат қилмоқда. 2020-2021 йилларда республика мустақилликка эришгандан бери энг юқори туғилиш кўрсаткичлари қайд этилди (2020 йилда – 426,8 минг бола, 2021 йилда – 446,8 минг бола). Шу билан бирга, оилада учинчи, тўртинчи, бешинчи ва ундан ортиқ бола туғилишининг ижобий тенденцияси кузатилмоқда.

Ижтимоий хизматлар порталининг ишга туширилиши маблағ ва реабилитация хизматларини кўрсатиш муддатини саккиз ойдан икки ҳафтага қисқартирди.

«Бироқ, реабилитация муассасаларининг сифати, етказиб берувчилар амал қиладиган нарх сиёсати ҳақида ҳали ҳам саволлар бор. Шу боис бу борадаги ишлар давом эттирилади», — деди Тамара Дуйсенова.

Меҳнат ва ижтимоий ҳимоя қилиш вазири пенсия таъминоти масалаларига алоҳида эътибор қаратди. Унинг сўзларига кўра, бугунги кунда республикада 2,2 млн пенсионер, шу жумладан, Атирау вилоятида 62,3 минг киши бор. Жорий йилнинг 1 июл ҳолатига кўра, базавий пенсияни ҳисобга олган ҳолда ўртача пенсия миқдори республикада 117,5 минг тенгени, Атирау вилоятида – 116,2 минг тенгени ташкил қилди.

Фото: gov.kz