Иордания самолётлари Ғазо секторига инсонпарварлик ёрдамини ташлади
Иордания Қуролли кучлари – Араб армияси (JAF) пайшанба куни ҳарбий самолётлар Ғазо сектори шимолига икки юк гуманитар ёрдам етказганини маълум қилди, дея хабар беради Кazinform мухбири.
Операция Баҳрайн ва Уммон билан биргаликда қамал остидаги ҳудудда давом этаётган урушдан жабр кўрган ғазоликларга гуманитар ёрдам етказиш мақсадида ўтказилди.
Иордания армияси ҳаво кўприги орқали ёрдам юборишни давом эттиришга ваъда берди, бу парашютдан ташқари, пойтахтнинг Марка аэропортидан жўнайдиган мунтазам ёрдам рейсларини ҳам ўз ичига олади ва Мисрнинг ал-Ариш халқаро аэропортига юкларни етказиб беради. Миср аэропортидан кейин ёрдам Фаластин анклавига юборилади.
Исроил ва ХАМАС гуруҳи ўртасидаги анклавда уруш бошланганидан бери Иордания шу кунгача Ғазо секторига 19 марта гуманитар ёрдам етказишга муваффақ бўлди. Бу амалиётларда Франция, Буюк Британия, Нидерландия, Миср, Бирлашган Араб Амирликлари, Уммон, Баҳрайн ва Қатар ҳарбийлари иштирок этди.
Бу ҳафта Иордания подшоҳи Абдулла II яна бир бор ҳаводан гуманитар ёрдам ташлаш операциясида иштирок этди, у самолёт ҳаво базасидан кўтарилишидан олдин тайёргарлик ва юклаш жараёнини бевосита назорат қилди.
Араб Лигаси Бош котиби Аҳмад Абул Ғайт пайшанба куни Иордания, Миср, БАА ва Қатар ҳарбий-ҳаво кучларининг Ғазо секторига биргаликда ёрдам етказилишини олқишлаб, буни ғазоликлар аҳволини енгиллаштиришда муҳим ютуқ деб атади.
А.Абул Ғайт араб давлатларини Исроил томонидан олиб борилаётган очарчилик ва блокада сиёсатига қарши кураш сифатида ушбу амалиётларни давом эттиришга чақирди. Шунингдек, у бу саъй-ҳаракатлар Ғазо секторидаги гуманитар инқирозни юмшатишга қаратилганини таъкидлади, деб хабар берди Иордания ахборот агентлиги Petra.
Муаллиф: Арсен Ўтешев
