Икки президентнинг учрашуви Қозоғистон ва Ўзбекистон халқларини яқинлаштириш йўлидаги муҳим қадам бўлди

ASTANА. Кazinform — Президентлар Қасим-Жомарт Тоқаев ва Шавкат Мирзиёевнинг Алмати шаҳрида ўтказилган норасмий учрашуви қардош Қозоғистон ва Ўзбекистон халқларини яқинлаштириш йўлидаги муҳим қадам бўлди. Бу ҳақда Президент маслаҳатчиси – Матбуот котиби Руслан Желдибай ёзди.

— Бу давлат раҳбарларининг бундай форматдаги биринчи учрашуви эмас. Президентлар 2023 йилда Чимкентда, 2024 йилда эса Хивада норасмий учрашувлар ўтказган. Бундай учрашувларнинг мунтазам ўтказилаётгани президентлар ўртасида ўзаро тушуниш ва ишончнинг юксак даражада ривожланганидан далолат беради, — деб ёзади у.

Алматидаги музокаралар мазмунли ва самарали бўлди. Давлат раҳбарлари савдо-иқтисодий, сармоявий, транспорт-логистика соҳасидаги ҳамкорликнинг асосий масалаларини муҳокама қилдилар. Минтақавий кун тартиби ҳам эътибордан четда қолмади.

— Ҳеч қандай келишув имзолаш режалаштирилмаган бўлса-да, президентлар Бош вазирнинг масъул ўринбосарлари ва вазирларга қатор топшириқлар берди. Хусусан, савдо айланмасини ошириш, транспорт алоқаларини яхшилаш, ҳудудлар ўртасидаги алоқаларни мустаҳкамлаш масалалари муҳокама қилинди. Айрим вазифалар учун аниқ муддатлар белгиланди. Ҳукумат аъзолари давлат раҳбарларининг навбатдаги йиғилишида белгиланган вазифалар якунлари бўйича ҳисобот бериши керак, — деди Руслан Желдибай.

Президентларнинг Алматига амалий ташрифи дастури воқеаларга бой бўлди.

— Шавкат Мирзиёев Қозоғистоннинг ахборот технологиялари ва сунъий интеллект соҳасидаги ютуқларига қизиқиш билдирди. Ўзбекистон давлат раҳбари AlmatyFair.ai кўргазмасининг ҳар бир стендига ташриф буюриб, турли IТ-ечимларнинг хусусиятлари ҳақида батафсил сўради. Маълумки, мамлакатимиз GovTech ва FinTechни ривожлантириш бўйича жаҳонда етакчилар қаторидан жой олган. Астана Тошкент билан ўз тажрибасини баҳам кўришга тайёр, — деди у.

Давлат раҳбарлари таниқли рассомлар Абилхан Қастеев ва Ўрол Тансиқбоевнинг кўргазмасини томоша қилдилар. Бу рамзий аҳамиятга эга бўлган воқеа эди.

Умуман олганда, Ўрол Тансиқбоев ҳаётига оид қизиқарли фактлар мавжуд. У — Тошкентда туғилган этник қозоқ. Ўзбекистон тасвирий санъатига асос солган. Унинг Ўзбекистон музейларидаги асарлари Қозоғистон жамоатчилигига илк бор кенг кўламда тақдим этилмоқда. Бир муддат аввал кўргазмани Ўзбекистон Президентининг ёрдамчиси Саида Мирзиёева очган эди. Бундан кўрамизки, халқларимиз умумий маданиятга эга. Бундай тадбирлар албатта давом этиши керак.

Шавкат Мирзиёевнинг Алмати шаҳрига амалий ташрифи мазмунли ва муваффақиятли бўлди. Ўзаро қўшма режалар, энг муҳими, ҳар икки давлат президентларининг иродаси ва қўллаб-қувватлаши бор.

— Астана ва Тошкент ўртасидаги яқин алоқалар давлатлараро муносабатларни мустаҳкамлаш ва бутун Марказий Осиёда барқарорликни сақлашнинг ҳаракатлантирувчи кучига айланди. Давлат раҳбари Қасим-Жомарт Тоқаев минтақадаги вазият мамлакатларимиз ўртасидаги муносабатлар ривожига боғлиқ, деб бежиз айтмаган. Ишончим комилки, президентларнинг анъанага айланган бундай норасмий учрашувлари бундан кейин ҳам чинакам қардошлик, дўстлик ва иттифоқчиликка асосланган Қозоғистон-Ўзбекистон муносабатлари мазмун-моҳиятини янада бойитади, — деб ёзади Руслан Желдибай.

Эслатиб ўтамиз, Шавкат Мирзиёев Қозоғистонга норасмий учрашув ўтказиш учун амалий ташриф билан келган эди.