Хитойнинг денгиздаги энг йирик газ конининг иккинчи босқичи ишга туширилди
ASTANА. Кazinform — Ушбу конда йиллик газ қазиб олиш ҳажми 4,5 миллиард куб метрдан ошиб, прогноз қилинган энг юқори даражага етиши кутилмоқда, деб хабар беради Xinhua.
Хитой миллий оффшор нефть корпорацияси (CNOOC) чоршанба куни Жанубий Хитой денгизида жойлашган «Шэньхай-1» газ кони лойиҳасининг иккинчи босқичи ишга туширилганини эълон қилди. Бу воқеа мамлакатдаги энг йирик денгиз газ лойиҳасининг тўлиқ амалга оширилганидан далолат беради.
«Шэньхай-1» конининг геологик захиралари 150 миллиард куб метрдан ошади. У ерда газ қазиб олиш 2021 йил июнь ойида, лойиҳанинг биринчи босқичи ишга туширилган пайтда бошланган.
Конда ишлаб чиқарилган табиий газ денгиз орқали Сянган махсус маъмурий ҳудуди, Хайнань оролидаги Санья шаҳри ва Гуандун провинциясининг Чжухай шаҳрига етказилади ҳамда мамлакатнинг асосий иқтисодий районларини газ билан қоплайди ва миллий газ қувурлари тармоғига уланади.
«Шэньхай-1» Хитойдаги энг мураккаб чуқур денгиз газ лойиҳаси ҳисобланади. Лойиҳа ички денгиз шельфида ҳеч қачон учрамаган энг юқори ҳарорат ва босим шароитида амалга оширилди. Ишлаш чуқурлиги 1500 метрдан ошади, энг чуқур қудуқлар эса 5000 метргача етади.
Лойиҳа менежери Лю Каннинг сўзларига кўра, ушбу лойиҳани амалга ошириш жараёнида яратилган ишлаб чиқариш инфратузилмаси ва технологик тизим келажакда денгизда нефть ва газни ҳар томонлама қидиришга йўл очади ва мамлакатнинг энергия хавфсизлигини таъминлашда денгиз ресурсларининг ролини оширишга ёрдам беради.
Эслатиб ўтамиз, аввалроқ Астанадаги LRT операторлари Хитойда малака ошираётгани ҳақида хабар берган эдик.
