Хитойдан Қозоғистонга келган сайёҳлар сони 78 фоизга ошди
ASTANA. Kazinform – 2024 йилда Қозоғистонга Хитойдан 655 минг сайёҳ ташриф буюрди. Бунга визасиз режимнинг жорий этилиши ва ҳаво қатновларининг кўпайиши сабаб бўлди. ҚР Туризм ва спорт вазири ўринбосари Ержан Еркинбаев икки давлат ўртасидаги сайёҳлик алоқалари ҳақида гапирди.
2024 йил баҳорида Пекинда “Хитойда Қозоғистон туризми йили” тантанали равишда очилди. Бу шунчаки рамзий воқеа эмас, балки хитойликлар орасида Қозоғистон туризмини тарғиб қилишга қаратилган кенг кўламли ишларнинг бошланиши эди.
Қозоғистонни хитойлик саёҳатчиларга яхшироқ таништириш мақсадида 37 хил тадбир ташкил этилди.
“Натижа узоқ кутилмади ва сайёҳлар оқими бир неча баробар ошди. Ўтган йили Хитойдан келган сайёҳлар сони 655 минг нафарга етди ва 2023 йилга нисбатан 78 фоизга ўсди. Бу визасиз режимнинг жорий этилиши ва ҳаво қатновларининг кўпайиши билан боғлиқ. Жорий йилда Гуанчжоу – Алмати, Чэнду – Алмати, Шанхай – Алмати, Шанхай – Чимкент, шунингдек, Сиань – Чимкент йўналишларида янги ҳаво йўналишлари очилмоқда”, – деди вазир ўринбосари Назарбоев университетида бўлиб ўтган “Бронза ва олтин одам – Хитой ва Қозоғистон ўртасидаги маданий алоқалар” форумида.
29 май куни эса “Сиань – Алмати” йўналиши бўйича биринчи туристик поезд йўлга чиқди. Ушбу ташаббус “Марказий Осиё – Хитой” иккинчи саммитига тўғри келди ва икки давлат ўртасидаги маданий-гуманитар алоқаларни ривожлантиришга қаратилган эди.
“Бу чора-тадбирларнинг барчаси Қозоғистон ва Хитой ўртасидаги сайёҳлик оқимини янада оширишга хизмат қилмоқда. 2025 йилнинг январь-май ойларида Хитойдан 280 мингга яқин сайёҳ келди, бу 2024 йилнинг шу даврига нисбатан 42 фоизга кўп. Бир ҳафта аввал Қозоғистонда Хитой туризми йилининг расмий очилиш маросимини ўтказдик. Бугунги тадбир эса икки давлат муносабатларида янги босқич бошланганидан далолат беради”, – деди Е.Еркинбаев.
