Ҳиндистондаги отишма қурбонлари сони 26 кишига етди

NEW DELHI. Kazinform – Ҳиндистон ҳукумати сешанба куни Жамму ва Кашмир ҳудудида содир этилган терактда ҳалок бўлган 26 кишининг исм-шарифини эълон қилди. Бу рўйхат News18 телеканали томонидан эълон қилинди, деб ёзади Report агентлиги.

Маълумотларга кўра, ҳалок бўлганларнинг барчаси эркак бўлган. Уларнинг аксарияти мамлакатнинг турли вилоятларидан келган сайёҳлардир. Аввалроқ қурбонлар орасида камида икки хориж фуқароси – Бирлашган Араб Амирликлари ва Непал фуқаролари борлиги хабар қилинганди.

ANI маълумотларига кўра, Ҳиндистон хавфсизлик кучлари террорчиларни қидиришда давом этмоқда. Ҳудуд ўраб олинган, полиция ва аскарлар кириб-чиқаётган барча машиналарни текширмоқда.

Ҳиндистон бош вазири Нарендра Моди теракт туфайли Саудия Арабистонига сафарини тўхтатди ва Нью-Деҳлига қайтиб келгач, эрталаб фавқулодда йиғилиш ўтказди. Йиғилишда бир қатор вазирлар ва идоралар раҳбарлари иштирок этди.

Жамму ва Кашмирда бўлган Ҳиндистон ички ишлар вазири Амит Шоҳ бугун теракт содир бўлган жойга ташриф буюриши мумкин.

Кўплаб сайёҳлар воқеа содир бўлган Жамму ва Кашмир ҳудудини тарк этишга шошилишмоқда. Маҳаллий аҳоли бундай ҳужумларга қарши оммавий норозилик намойиши ўтказишга қарор қилган. Шу сабабли бугунги кунда вилоятдаги кўплаб муассасалар ишламаяпти.

Отишма сешанба куни тушдан кейин "Ҳиндистоннинг кичик Швейцарияси" деб номланувчи машҳур сайёҳлик маскани Паҳалгамда содир бўлди. Хаки кийимидаги номаълум қуролли шахслар Байсаран водийсида сайр қилаётган сайёҳларга қарата ўт очган.