Ҳиндистон жанубида кучли ёмғирлар оқибатида 27 киши ҳалок бўлди

ASTANA. Kazinform - Ҳиндистон жанубидаги Телангана ва Андхра-Прадеш штатларида кучли ёмғирлар оқибатида 27 киши ҳалок бўлди, дея хабар беради Kazinform Синьхуага таяниб.

Шанба куни бошланган ва бутун якшанба куни давом этган ёмғирлар бир қанча ҳудудларда сув тошқинларига сабаб бўлиб, автомобиль ва темир йўл алоқаларини тўхтатган. Ҳар икки штатдаги дарёлар ва сув ҳавзаларида сув тошқини давом этмоқда.

Теланганада камида 15 киши, Андхра-Прадешда эса 12 киши ҳалок бўлгани хабар қилинган.

Қутқарувчилар икки штатдаги сув босган ҳудудлардан минглаб одамларни эвакуация қилиб, лагерларга жойлаштирди.

Эслатиб ўтамиз, сув тошқини билан бошқа давлатлар ҳам курашмоқда.

Шундай қилиб, Ямандаги вайронкор сув тошқинлари 150 дан ортиқ одамнинг ҳаётига зомин бўлди. Эфиопияда 400 мингга яқин одам жабрланган.