ХАМАС тўрт маҳбуснинг жасадини Қизил Хочга топширди

ASTANA. Kazinform – Қурбонлар орасида икки бола ва уларнинг онаси ҳам бор, деб ёзади BBC.

Тинчлик келишуви доирасида ХАМАС томонидан Қизил Хочга топширилган 4 кишининг жасади Исроилга келтирилди. Улар 7 октябрь куни Исроил фожиаси рамзига айланган сарғиш сочли Ариэль ва Кфир Бибас, шунингдек, уларнинг онаси Шири ва 83 ёшли Одед Лифшицдир.

ХАМАС Қизил Хочга тўртта тобутни топширди. Уларнинг ҳар бирида гаровга олинганларнинг кичик суратлари бор эди. Қизил Хоч ташкилоти уларни Ғазо секторидаги ЦАХАЛ кучларига топширди.

Жасадларни қабул қилиб олгач, Исроил армиясининг бош раввини қисқа маросим ўтказди. Жасадлар Исроил байроғига ўралган тобутларда мамлакатга олиб келинган.

Исроил жасадларнинг шахсини аниқлаш учун аутопсия ўтказади. Бу жараён 48 соат давом этиши мумкин.

Ғазо секторида уруш бошланганидан бери ХАМАС илк бор асирларининг жасадларини Исроилга топширмоқда.

Исроил президенти Ицхак Херцог жон таслим қилганлардан узр сўради.

“Бошимни эгиб, Исроил давлати номидан узр сўрайман. Мен сизларни ўша даҳшатли кунда ҳимоя қила олмадим. Уйга эсон-омон олиб кела олмаганимдан афсусдаман”, – деб ёзди у Х ижтимоий тармоғида.

Жасадларни Қизил Хочга топширишдан олдин ХАМАС гаровга олинганлар Исроил ҳаво ҳужумида ҳалок бўлганини маълум қилди. Улар “гаровга олинганларни ҳимоя қилиш учун” ва “жонларини сақлаб қолиш учун” қўлидан келган барча ишни қилганликларини айтишган.

Исроил бу даъволарни тасдиқламади. Соғлиқни сақлаш вазири Уриэль Буссо жасадларни текшириш чоғида имкон қадар ўлим сабаблари аниқланишини айтди.

Эслатиб ўтамиз, аввалроқ ХАМАС урушни тугатиш учун барча асирларни озод қилишни таклиф қилгани ҳақида хабар берган эдик.

Исроил бош вазири Биньямин Нетаньяху Фаластин миллий маъмурияти урушдан кейин Ғазо секторини бошқармаслигини айтди.