Германия канцлери суриялик қочқинларни қўллаб-қувватлади

ALMATY. Кazinform – Германия жамиятида ишлаган ва интеграциялашган Сурия фуқаролари мамлакатда қолишда давом этишлари мумкин. Бу ҳақда канцлер Олаф Шольц шу ҳафта халққа қилган мурожаатида айтди. Бу ҳақда 24 kz ёзган.

Асад режимининг қулаши ортидан Бундестаг депутатлари суриялик қочқинларни ўз мамлакатига қайтариш масаласини кўтариб, ҳатто депортация қилиш эҳтимолини ҳам тилга олди. Шу муносабат билан Германиядан бошпана излаётган муҳожирлар хавотир билдира бошлади. Аммо Шольцнинг мурожаатидан кейин расмий Берлиннинг позицияси ойдинлашгандек бўлди. Асад режими қулаганини эшитган Берлиндаги сурияликлар асосан, Германияга собиқ канцлер Ангела Меркель даврида фуқаролар урушидан қочиш учун келган. Ҳозир уларнинг сони миллионга яқин.

Германия Туркия ва Ливандан кейин энг кўп суриялик қочқинларга мезбонлик қилади. Бироқ, уларнинг қувончи бу ҳафта депортация таҳдиди билан аралашиб, қўрқувга айланди. Бундестагдаги бўлажак сайловларда очко тўплаш истагида бўлган партиялар миграция масаласини халқ норозилигига баҳона қилиб, сурияликларни ватанига қайтариш ҳақида гапира бошлади. Шунингдек, янги қочқин мақомини беришни вақтинча тўхтатди. Канцлер Олаф Шольцнинг ўзи ижтимоий тармоқларда мурожаат эълон қилиб, бир ҳафта давом этган баҳс-мунозараларга нуқта қўйишга уринди.

— Биз суриялик қочқинларга немис тилини ўрганиш, мактабларимизда таълим олиш, ишлаш ва бу мамлакатда чуқур илдиз отишига ёрдам бердик. Бу биз учун катта ютуқдир. Бугунги кунда биргина Германия соғлиқни сақлаш соҳасида беш мингдан ортиқ суриялик шифокор ишлайди. Депутатларнинг айрим баёнотлари айнан шу Сурия фуқароларида шубҳа уйғотганидан хабардорман. Лекин барчангизга шуни айтмоқчиман. Ишлаган ва немис жамиятига сингиб кетган ҳар бир чет эл фуқароси мамлакатимизда қолишга тўлиқ ҳақлидир, - деди Германия канцлери Олаф Шольц.

Германия, Берлин

Канцлернинг сўзларини Германиянинг Der Spiegel журнали ҳам тасдиқлаган. Уларнинг тадқиқотларига кўра, ҳозирда Германиянинг тиббиёт соҳасида 5758 нафар суриялик шифокор ишлайди. Уларнинг Сурияга кўчирилиши эса мутахассислар етишмаслигидан қийналаётган Германия соғлиқни сақлаш тизимига катта танглик келтириши мумкин.

— Сурияда Асад режими қулаганидан хурсандмиз. Ватанимизни соғиндик. Биз уйга кетмоқчимиз. Бироқ, ҳозир миграция учун вазият беқарор. Германиядаги бир гуруҳ суриялик шифокорлар ўртасида ўтказилган сўров шуни кўрсатдики, улар ўз ватанларига қайтишни исташса-да, у ердаги вазият яхшиланиши ва барқарорлашишини кутиш кераклигини айтадиганлар кўп. Ҳозир аниқ жавоб бериш қийин, - дейди суриялик шифокор Санди Исса.

Айни пайтда суриялик шифокор Файсал Шеҳаде фарзандлари немис мактабларида таҳсил олаётганини айтади.

- Менинг оилам, дўстларим ва қўшниларим Германияда. Фарзандларим немис мактабларида ўқишади. Биз бу ерга ўрганиб қолганмиз. Агар яқин бир-икки йил ичида Суриядаги вазият барқарорлашса, ўшанда аниқ қарор қабул қиламиз, деб ўйлайман. Бу ердаги сурияликлар “янги озод қилинган ватанимизга қандай фойда келтириши мумкинлиги ҳақида ҳали ҳам ўйлашмоқда”, дейди суриялик шифокор Файсал Шеҳаде.

Иордания, Ақаба

Суриядаги ҳокимиятнинг келажаги қандай бўлиши ҳозирча номаълум. Шу кунларда Германия, Туркия, АҚШ, Араб ва Европа Иттифоқи давлатлари ҳамда Иордания дипломатлари Дамашқ келажагини муҳокама қилиш учун йиғилди. Шу боис Германиядаги қочқинлар чегарадош бўлган Туркиядаги сурияликлардан фарқли ўлароқ, воқеаларнинг ривожланишини кутишни афзал кўрмоқда.