Германия бизнеси Қозоғистонга 6 миллиард долларга яқин сармоя киритган

Қозоғистон Президенти Германия иқтисодиёти Шарқий қўмитаси (ГИШҚ) томонидан ташкил этилган икки мамлакат ишбилармон доираларининг давра суҳбатида иштирок этди, деб хабар беради Kazinform ХАА Ақорда расмий сайтига таяниб.

Давлат раҳбари ўз нутқида геосиёсий нотинчликка қарамай, ўтган йили ўзаро товар айирбошлаш ҳажми 25 фоизга ўсиб, 2,8 миллиард долларга етганини таъкидлади. Унинг сўзларига кўра, немис бизнеси Қозоғистонга 6 миллиард долларга яқин сармоя киритган. Ушбу сармоянинг 90 фоизга яқини нохом ашё секторига тўғри келади. Умуман олганда, мамлакатда Германия капитали улушига эга мингдан ортиқ корхона фаолият юритмоқда.

Қасим-Жомарт Тоқаев Германиянинг қатъиятлилик, аниқлик ва масъулият тамойилларига асосланган бизнес юритиш услубини юқори баҳолади. Шунингдек, у “Қозоғистонда немис сифати бўйича ишлаб чиқарилган” формуласи бўйича маҳсулот ишлаб чиқарадиган корхоналарини очишдан манфаатдор эканини маълум қилди.

 

 

Давлат раҳбари ўзаро ҳамкорликнинг бир қатор истиқболли йўналишларини қайд этди. Президентнинг сўзларига кўра, Қозоғистон табиий ресурслар ва муҳим хом ашё соҳасида, биринчи навбатда, Германия ва Европа саноати учун ишончли шерик бўлишга тайёр.

“Ҳисоб-китобларга кўра, 2040 йилга бориб, муҳим материаллар ва нодир металларга жаҳон талаби тўрт баробар ортади. Жаҳон банки маълумотларига кўра, Қозоғистонда қиймати 46 триллион доллардан ортиқ бўлган 5 мингдан ортиқ ўрганилмаган конлар мавжуд. Шу боис Канцлер Олаф Шольцга қўшма хом ашё ўзлаштириш лойиҳаларини амалга ошириш учун Консорциум тузишни таклиф қилдим. Бу ташаббус ҳукуматлараро шериклик тўғрисидаги амалдаги келишувлар қаторида ҳамкорлигимизни янги босқичга кўтариш имконини беради. Германия хусусий инвесторларини ушбу Консорциумга қўшилишга таклиф қиламан”, – деди Давлат раҳбари.

Президент қайта тикланадиган энергия манбалари соҳасидаги ҳамкорликни яна бир истиқболли йўналиш сифатида қайд этди.

Қасим-Жомарт Тоқаев мамлакатда “яшил” водород ишлаб чиқарувчи дунёда етакчи бўлиш учун барча шарт-шароитлар мавжудлигини таъкидлади.

 

 

Айни пайтда Германия-Швециянинг Svevind Group қўшма компанияси билан “яшил” водород ишлаб чиқариш бўйича 50 миллиард долларлик шартнома имзоланган. Бу дунёдаги энг йирик лойиҳалардан бири. Келажакда "яшил" водород ишлаб чиқариш "яшил" пўлат, алюминий ва бошқа металлар ишлаб чиқаришга йўл очиши мумкин. Президент Германиянинг технологик ечимларини Қозоғистоннинг табиий ва инсон ресурслари билан уйғунлаштириш юксак натижаларга эришишига ишонч билдирди.

Ҳамкорликнинг яна бир йўналиши – транспорт-логистика салоҳиятидан фойдаланиш. Давлат раҳбарининг таъкидлашича, янги геосиёсий вазиятда Европа ва Осиё ўртасидаги алоқани таъминлашда “Ўрта йўлак”нинг аҳамияти ортиб бормоқда.

Президент қишлоқ хўжалиги соҳасида ҳамкорликни ривожлантириш учун катта имкониятлар мавжудлигини таъкидлади.

“Қозоғистон минтақанинг озиқ-овқат марказига айланишни режалаштирмоқда. Шу мақсадда маҳсулотларни ишлаб чиқариш, сақлаш ва тақсимлашни бирлаштирувчи савдо-логистика алоқаларининг ҳудудлараро тизими яратилади. Қозоғистон қишлоқ хўжалигининг барқарор ривожланишига биотехнология ва ўғитлар ишлаб чиқариш, сунъий йўлдош орқали зондлаш ва сунъий интеллект, қишлоқ хўжалиги техникаси ишлаб чиқариш, ирригация, шунингдек, озиқ-овқат саноати, генетика ва қайта тикланадиган энергия манбалари каби турли соҳаларга ихтисослашган кўплаб немис компаниялари жалб этилиши мумкин”, – деди Давлат раҳбари.

Қасим-Жомарт Тоқаевнинг сўзларига кўра, ҳамкорликнинг яна бир устувор йўналиши IT технологиялари соҳаси бўлиши мумкин. Президент Қозоғистоннинг рақамли трансформация йўналишидаги ташаббуслари жаҳон миқёсида эътироф этилганини таъкидлади. БМТ электрон ҳукумат тизимини ТОП-30 рўйхатига киритди.

“2025 йилгача IT маҳсулотлар ва хизматлар экспортини 1 миллиард долларга етказишни ва 100 минг жаҳон миқёсида рақобатбардош IT мутахассисларини тайёрлаш орқали инсон капиталини мустаҳкамлашни режалаштирганмиз. Германиялик ҳамкорларимиз билан ҳамкорликнинг бир қанча йўналишлари, жумладан, илмий-тадқиқот ишлари, стартаплар, таълим, коммуникациялар ва бошқа тегишли соҳаларда лойиҳаларни амалга оширишга тайёрмиз”, – деди Давлат раҳбари.

Президент инсон капиталини ривожлантириш ва инвестицияларни жалб этиш масаласини ҳамкорликнинг долзарб йўналишларидан бири сифатида қайд этди.

Инсон капитали соҳасида Каспий давлат университети қошида Қозоғистон-Германия муҳандислик институти ва Шарқий Қозоғистон техника университети қошида Қозоғистон-Германия фан ва технология институтини очиш ташаббуси аллақачон бошланган. Қозоғистон “Астана” халқаро молия маркази сайти орқали хорижий инвесторларга сармоя жалб этиш учун барча имкониятларни яратаётгани таъкидланди.

Қасим-Жомарт Тоқаев немис ишбилармонларини Қозоғистон иқтисодиётини диверсификация қилиш, янги ишлаб чиқариш қувватларини очиш ва илғор немис технологияларини жорий этишга қаратилган лойиҳаларни амалга оширишда фаол иштирок этишга таклиф қилди.

Германия иқтисодиёти Шарқий қўмитаси Германия Федератив Республикасининг Марказий, Шарқий ва Жануби-Шарқий Европа, Жанубий Кавказ ва Марказий Осиёдаги 29 давлат учун минтақавий ташаббуси ҳисобланади.

Шарқий қўмита Германиянинг олтита етакчи иқтисодий иттифоқи томонидан қўллаб-қувватланади ва 400 га яқин компания аъзо.

Учрашувда Германия иқтисодиёти Шарқий қўмитаси бошқаруви раиси Катрина Клаас-Мюльхойзер, Германия саноати федерал иттифоқи (BDI) бошқаруви аъзоси Вольфганг Нидермарк, шунингдек, Deutsche Bahn, Knauf, Wilo, BASF, Rhenus, Svevind ва бошқа бир қатор йирик компанияларнинг топ-менежерлари ҳисобот берди. Улар Қозоғистон билан иқтисодиётнинг муайян йўналишлари бўйича ҳамкорликнинг бугунги ҳолати ва ривожланиш истиқболлари ҳақида ўз фикрлари билан ўртоқлашдилар.