Франциянинг Қозоғистондаги сармоялари 20 миллиард долларга яқинлашди
ASTANA. Kazinform – ҚР Бош вазир Олжас Бектенов Франция Республикасининг ташқи савдо ва хориждаги француз фуқаролари бўйича вазир делегати Лоран Сен-Мартен иштирокида Қозоғистон-Франция сармоявий форуми ишини очди, дея хабар беради Kazinform агентлиги.
“Франция билан ҳамкорлик Қозоғистон ташқи сиёсатининг асосий устувор йўналишларидан бири ва Европа Иттифоқи доирасидаги ҳамкорлигимизнинг ажралмас қисмидир. Мамлакатларимиз ўртасида мустаҳкам сиёсий алоқалар, фаол ҳукуматлараро ва парламентлар мулоқоти, шунингдек, динамик савдо ва сармоявий ҳамкорлик билан ажралиб турадиган кучли ва кўп қиррали шериклик мавжуд”, - деди Олжас Бектенов.
Ташкилотчиларнинг маълум қилишича, форумда 300 га яқин делегатлар – Қозоғистон ва Франция давлат идоралари, ҳокимликлари, ишбилармон доиралари ва саноат бирлашмалари вакиллари иштирок этди.
Ўтган йили икки давлат ўртасидаги товар айирбошлаш ҳажми 31 фоизга ўсиб, рекорд даражадаги 5,5 миллиард долларга етди, экспорт ҳажми 3,6 миллиард долларни ташкил этди. Қозоғистондаги француз сармоялари 20 миллиард долларга яқинлашмоқда, мамлакатда француз сармояси иштирокидаги 200 дан ортиқ компания фаол ишлаяпти.
Бош вазир асосий қўшма лойиҳаларга, жумладан, “Total Energies” компанияси томонидан Қозоғистон жанубида қуввати 1 ГВт қувватга эга шамол электр станциясини қуриш, Alstom томонидан ишлаб чиқаришни маҳаллийлаштириш ва темир йўл секторига янги инвеститсиялар, Air Liquide компаниясининг Павлодар нефть-кимё заводида водород энергетикаси лойиҳаси, Danone, Lactalis, Lidea ва бошқалар иштирокида озиқ-овқат ва сут саноатини ривожлантиришга эътибор қаратди. Қозоғистон Транскаспий халқаро транспорт йўналишини ривожлантириш ҳамда сунъий интеллект, фармацевтика, туризм ва сув ресурсларини бошқариш каби соҳаларда ҳамкорлик қилишдан манфаатдор. Шунингдек, таълим ва илмий ҳамкорликдаги ютуқлар, жумладан, Астана ва Алмати шаҳарларида француз мактаблари очилиши, Абай номидаги Қозоғистон Миллий педагогика университети қошидаги Lumière маркази ва Лотарингия университети филиали фаолияти қайд этилди.
“Франция доимий равишда Қозоғистоннинг энг йирик савдо ҳамкорлари ўнталигига киради ва инвестициялар ҳажми бўйича Европа Иттифоқи мамлакатлари орасида биринчи ўринда туради. Биргина ўтган йилнинг ўзида умумий қиймати қарийб 300 миллион долларлик олтита қўшма лойиҳа амалга оширилди, яна йигирмадан ортиқ ташаббус амалга оширилмоқда. Биз француз бизнесининг Қозоғистон иқтисодиёти ривожига қўшган ҳиссасини юксак қадрлаймиз ва бундан кейин ҳам инвесторлар учун энг қулай шарт-шароитларни яратишга тайёрмиз”, - деди ҚР Ташқи ишлар вазири ўринбосари Алибек Қуантиров.
Ўз навбатида, француз спикерлар Қозоғистон бозорида ўз иштирокини кенгайтиришга юқори қизиқиш билдирдилар ва устувор тармоқларда қўшма лойиҳаларни амалга оширишга тайёр эканликларини таъкидладилар. Барқарор ривожланиш, ишлаб чиқаришни маҳаллийлаштириш, технологиялар трансфери ва икки мамлакат компаниялари ўртасидаги ишбилармонлик алоқаларини мустаҳкамлаш масалаларига алоҳида эътибор қаратилди.
Форум якунида иқтисодиётнинг турли тармоқларида қўшма лойиҳаларни ишлаб чиқишга қаратилган тижорат шартномаларини имзолаш маросими бўлиб ўтди.
