Финляндия компаниялари Қозоғистонда ўз ваколатхонасини очиб, Марказий Осиё бозорига чиқиши мумкин
ASTANА. Кazinform - Астанада Қозоғистон-Финляндия савдо-иқтисодий ҳамкорлик комиссиясининг 13-йиғилиши якунланди. Ўтган йили икки давлат ўртасидаги товар айирбошлаш ҳажми 208 миллион долларга етди.
Ўз нутқида Қозоғистон Республикаси Экология ва табиий ресурслар вазири ўринбосари Ж. Алиевнинг қайд этишича, Қозоғистон Финляндияни Шимолий Европа минтақасидаги асосий ҳамкор деб билади.
“Биз икки томонлама муносабатларнинг барча йўналиши бўйича ҳамкорликни янада оширишдан манфаатдормиз. 2023 йилда мамлакатларимиз ўртасидаги ўзаро товар айирбошлаш ҳажми ўтган йилга нисбатан 3 фоизга ошиб, 208 миллион долларни ташкил этди. Қозоғистон Республикасидан Финляндияга экспорт 3 миллион долларни, Финляндиядан Қозоғистон Республикасига импорт 205 миллион долларни ташкил этди”, — деди вазир ўринбосари комиссия йиғилишида.
Унга кўра, Финляндиядан Қозоғистон Республикасига 2005 йилдан 2023 йилнинг 3-чорагигача тўғридан-тўғри инвестицияларнинг умумий оқими 409,5 миллион долларни, 2023 йилда эса 11,6 миллион долларни ташкил қилган.
“Мамлакатимизда сармоявий муҳитни яхшилаш борасида изчил ишлар олиб борилмоқда, инвесторлар учун яхши шароит яратилган. Бундан ташқари, Қозоғистонда йирик саноат корхоналари ва халқаро корпорацияларни мамлакатга кўчириш бўйича чора-тадбирлар фаол амалга оширилмоқда. Шу муносабат билан Қозоғистонда ишбилармонлик муҳитини доимий равишда яхшилаш доирасида Финляндия бизнеси Марказий Осиё минтақаси бозорига кириш учун янги платформага эга бўлиши мумкин. Юқоридагиларни инобатга олган ҳолда Финляндия компанияларини Қозоғистонда ўз ваколатхоналарини очишга таклиф қиламиз”, — деди Жомарт Алиев.
Қайд этиш жоизки, хорижий делегация таркибида Финляндия ҳамраиси, Финляндия Ташқи савдо ва ривожланиш вазири Вилле Тавио, Финляндия Ташқи ишлар вазирлигининг Россия, Шарқий Европа ва Марказий Осиё департаменти директори ўринбосари Микко Кивикоски, Финляндия Геология хизмати бош директори Киммо Тииликайненлар бор.
Учрашувда икки томонлама ҳамкорликни янада мустаҳкамлаш ва кенгайтиришга доир кенг кўламли масалалар муҳокама қилинди. Саноат, таълим, транспорт, энергетика, шунингдек, ўрмон хўжалиги соҳаларидаги ўзаро ҳамкорликнинг жорий ва истиқболли йўналишлари кўриб чиқилди.
