Фарғонада караоке кафеси ёниб кетди: 6 киши ҳалок бўлди, 7 киши касалхонада

FERǴANA. Kazinform – 29 июлда Фарғона шаҳрида одамлар қурбон бўлган ёнғин содир бўлди. 4 қаватли бинонинг биринчи қаватида жойлашган караоке-кафе ёниб кетди, дея хабар беради Kazinform nuz.uzга таяниб.

Хабар қилинишича, ёнғин ҳақида хабар соат 11:39 да келиб тушган. Ёнғинни ўчиришга 6 нафар ёнғин-қутқарув гуруҳи жалб этилган бўлиб, улар воқеа жойига соат 11:44 да етиб келишган. Соат 11:48 да ёнғин қуршаб олинди, соат 11:56 да тўлиқ ўчирилди.

Ёнғин оқибатида 6 киши ҳалок бўлган. Яна 7 киши турли тан жароҳатлари билан касалхонага ётқизилган.

Президент фармойиши билан Бош вазир ўринбосари А.Раматов бошчилигида Ҳукумат комиссияси тузилди. Ҳодисани ўрганиш ва жабрланганларга ёрдам кўрсатиш учун комиссия Фарғона вилоятига жўнаб кетган.