Европа Иттифоқи мудофаа харажатларини оширади
Европа ташқи ҳаракатлар хизмати (ЕЕАS) ва Европа Иттифоқи ҳарбий штаб-квартираси (ЕUMS) билан яқин ҳамкорликда ишлаб чиқилган мувофиқлаштирилган йиллик мудофаа шарҳи (CАRD 2022) Европа мудофаа агентлиги кенгаши йиғилишида мудофаа вазирларига тақдим этилди.
Ҳисоботда қайд этилишича, ҳозирги босқичда мудофаа харажатларининг ошиши ҳам Европа Иттифоқи учун имконият, ҳам мудофаа соҳасида қийинчиликдир.
Европа мудофаа агентлигининг ҳисоб-китобларига кўра, Европа Иттифоқининг қўшимча маблағлари мудофаа қобилиятидаги узоқ йиллик бўшлиқларни тўлдириши мумкин.
Кенгаш йиғилиши натижасида Европа Иттифоқининг ташқи ишлар ва хавфсизлик сиёсати бўйича олий вакили журналистларга шундай деди: «Биз кечаги урушга эмас, эртанги кун урушига қарши курашишга тайёр бўлишимиз керак ва бу янги технологик имкониятларни талаб қилади».
«Яхшироқ сарфлашнинг энг яхши йўли - мувофиқлаштирилган тарзда сарфлашдир», - деди Европа дипломатияси раҳбари ва мудофаа соҳасидаги ҳамкорлик ва харажатларнинг ошиши билан биргаликда Европа ҳар қандай инқирозга жавоб бериш учун кучга эга бўлишини таъминлашнинг ягона йўли эканлигини қўшимча қилди.
ЕИ ташқи сиёсат департаменти раҳбарининг сўзларига кўра, Европа Иттифоқи давлатлари 2025 йилгача мудофаа харажатларини 70 миллиард еврога оширишни режалаштирмоқда.
Жосеп Боррел, шунингдек, Европа Комиссияси пандемия пайтида вакциналарни олиш учун ишлатиладиган моделга ўхшаш Европа Иттифоқи миқёсида қўшма қурол сотиб олишга интилаётганини айтди.
«Бозорнинг парчаланиши ва рақобатнинг олдини олиш учун биргаликда ҳаракат қилиш муҳим», - деди Жосеп Боррель.
Бироқ, Европа Иттифоқи мудофаа расмийлари ҳамкорликнинг кучайиши, агар якка ҳолда амалга оширилса, Европа Иттифоқи ичидаги бўлинишнинг кучайишига ҳам ҳисса қўшишидан хавотирда.
Бунинг учун CАRD 2022 ҳисоботида Европа Иттифоқига аъзо давлатлар биргаликда «тўлдириши» керак бўлган мудофаа қобилиятидаги бир қанча муҳим бўшлиқлар аниқланган, масалан, узоқ масофали ҳаво транспорти, самолёт ташувчи кемалар, ҳарбий кема танкерлари ва ҳаво мудофаа тизимлари.
Муаллиф: Арнур Раҳимбеков
