Елена Рибакина Дубайдаги жаҳон турнирида ғолиб чиқди

ASTANA. Kazinform – Қозоғистонлик Елена Рибакина қатнашган “Лочинлар” (Falcons) жамоаси Дубайда (БАА) бўлиб ўтган World Tennis League-2024 кўргазмали турнирида ғолиб чиқди.

Жаҳон теннис лигасида “Лочинлар” шарафини Е.Рибакинадан ташқари россиялик Андрей Рублев, канадалик Денис Шаповалов ва франциялик Каролин Гарсия ҳимоя қилди.

“Лочинлар” финалда «Хоукс»ни (Жордан Томпсон, Арина Соболенко, Сумит Нагал ва Мирра Андреева) мағлуб этишди.

Ушбу баҳсда Е.Рибакина яккалик баҳсларида тўртта ўйин ўтказган бўлиб, улардан бирида руминиялик Симона Халепни мағлуб этди (6:4). Қолган учтасида дунёнинг 1-ракеткаси беларуслик Арина Соболенко (6:7), польшалик Ига Швентек (3:6) ва россиялик Мирра Андреевага (2:6) имкониятни бой берди.

Икки йил аввал қозоғистонлик теннисчи мусобақа ғолиби бўлганди.

Энди Елена Рибакина 27 декабрдан 5 январга қадар Австралиянинг Сидней ва Перт шаҳарларида бўлиб ўтадиган United Cup турнирида Қозоғистон терма жамоаси сафида қатнашади.

Эслатиб ўтамиз, аввалроқ Елена Рибакина юрт шаънини ҳимоя қилиш ўзгача туйғу бағишлашини айтганини ёзган эдик.