ЕИ Ҳиндистон ва Покистонни вазминликка чақиради

ASTANA. Kazinform – Европа Иттифоқи Кашмирдаги терактни қоралаб, Ҳиндистон ва Покистонни вазминлик ва мулоқотга чақирди, деб хабар берди Anadolu агентлиги.

Европа Иттифоқи (ЕИ) Кашмирдаги 26 кишининг ҳаётига зомин бўлган терактни қоралаб, Ҳиндистон ва Покистонни вазминликка ва мулоқотга чақирди. Бу ҳақда Европа ташқи ҳаракатлар хизмати тарқатган баёнотда айтилган.

“Европа Иттифоқи ва унга аъзо давлатлар 22 апрель куни Кашмирда содир этилган теракт ва бегуноҳ фуқароларнинг ҳалок бўлишини кескин қоралайди”, – дейилади ҳужжатда.

Брюссель айбдорларни жавобгарликка тортишга чақирди.

Баёнотда, Европа Иттифоқининг минтақада кескинлашган таранглик ва қурбонлар сонининг ортиб бораётганидан хавотирда эканлиги қайд этилди.

“Европа Иттифоқи ҳар икки томонни босиқликка, кескинликни юмшатишга ва тинч аҳоли ҳаётини ҳимоя қилиш учун куч ишлатишдан тийилишга чақиради”, – деди Европа Иттифоқи.

Ҳужжатда, шунингдек, Ҳиндистон ва Покистон халқаро қонунларга риоя қилиш ва тинч аҳолини ҳимоя қилиш учун барча чораларни кўриши кераклиги қайд этилган. Европа Иттифоқи можарони юмшатиш учун барча томонлар билан ҳамкорлик қилишга тайёрлигини билдирди.

Ҳиндистоннинг Покистон ҳудудига ҳужуми

6 май куни Ҳиндистон 22 апрель куни Паҳалгам ҳудудида содир этилган терактга жавобан Покистон ва унинг назорати остидаги Азад Кашмир ҳудудига ракета зарбаларини берди. Ушбу ҳужумда 26 киши ҳалок бўлди.

Ҳиндистон томонига кўра, Нью-Деҳли “террорчилик инфратузилмаси” деб атаган тўққизта нишон йўқ қилинган. Покистон расмийлари ҳужумларда тинч аҳолига мўлжалланган олти нишон зарар кўрганини ва 26 киши ҳалок бўлганини айтди.

Покистон армияси Ҳиндистоннинг бешта жанговар самолётини уриб туширганини айтди, бироқ Нью-Деҳли бу маълумотни тасдиқламади.

Ҳиндистон Бош вазири Нарендра Моди операцияни "ғурурли дақиқа" деб атади ва ҳукумат ичида унга «Синдур операцияси» номи берилганини айтди. Ҳинд маданиятида "синдур" - турмуш қурган аёлларнинг пешонасига суртиладиган қизил кукун.