Дзюдо бўйича Осиё кубогида Қозоғистон биринчи ўринни қўлга киритди

ASTANA. Kazinform – Алмати шаҳрида дзюдо бўйича ўсмирлар ва ёшлар ўртасида Бекет Махмутов хотирасига бағишланган Осиё кубоги якунланди, дея хабар беради Kazinform мухбири.

Қозоғистон дзюдо федерацияси матбуот хизмати хабарига кўра, Қозоғистон ўсмирлар ва ёшлар терма жамоалари ўз ёш тоифаларида медаллар бўйича биринчи ўринни эгаллади.

Халқаро дзюдо федерацияси (IJF) тақвимига киритилган расмий рейтинг мусобақасида 2006-2007 йилларда туғилган ўсмирлар ва 2003-2005 йилларда туғилган ёш татами усталари иштирок этди.

Қозоғистон ўсмирлар терма жамоаси Осиё кубогида 9 та олтин, 6 та кумуш ва 12 та бронза медалини қўлга киритиб, 10 та давлат орасида пешқадамлик қилди.

Ўзбекистон спортчилари иккинчи (5 олтин, 6 кумуш, 14 бронза), Мўғулистон вакиллари учинчи ўринни (2 олтин, 1 кумуш, 1 кумуш) эгаллади.

IJF қоидаларига кўра, Осиё кубоги ғолиблари ва иккинчи ўринларини эгаллаган спортчиларга рейтинг очколари қўшилади. Мусобақа ғолиблари 100 балл, кумуш медал соҳиблари 60 балл, учинчи ўрин эгалари 40 балл олади.

Бу очколар эса дзюдочиларнинг жаҳон чемпионатида қатнашиш имкониятига эга бўлиши учун зарур.

Ёшлар ўртасидаги мусобақада Гонконг, Грузия, Греция, Қирғизистон, Латвия, Мўғулистон, Тожикистон, Туркманистон, АҚШ, Ўзбекистон ва Қозоғистон терма жамоалари спортчилари иштирок этди.

Ушбу ёш тоифасида Қозоғистон 7 олтин, 6 кумуш ва 14 бронза медали билан умумжамоа рейтингида пешқадамлик қилди.

Ўзбекистон спортчилари иккинчи (5 олтин, 7 кумуш, 7 бронза), Қирғизистон спортчилари учинчи (1 олтин, 5 бронза) ўринни эгаллади.

Бу йил олтинчи бор ташкил этилаётган Осиё кубогида жами 680 нафар спортчи иштирок этди.

Эслатиб ўтамиз, Осиё кубоги доирасида ҳакамлар учун халқаро семинар-имтиҳон ўтказилди.

IJF мутахассислари иштирокида ўтказилган семинар-имтиҳон натижасида имтиҳондан муваффақиятли ўтган қозоғистонлик мутахассислар Самат Сапишев IJF International, Асхат Житкеев ва Николай Иванов IJF Contenintal ҳаками унвонига сазовор бўлди.

Бекет Сапабекули Махмутов 2009-2012 йилларда Қозоғистон дзюдо федерацияси президенти ва Осиё дзюдо иттифоқи вице-президенти лавозимларида ишлаган.

2017-йилдан бери Алмати шаҳрида дзюдо бўйича Бекет Махмутов номидаги турнир анъанавий тарзда ўтказиб келинмоқда.

Муаллиф: Ғайсағали Сейтақ