Дунёдаги зарарли чиқиндиларнинг бор-йўғи 1 фоизи Марказий Осиё мамлакатларига тўғри келади – ҚР Президенти
BAKU. Kazinform – Қозоғистон Президенти Бокуда бўлиб ўтаётган Бутунжаҳон иқлим саммитида нутқ сўзлади, деб хабар беради Ақорда.
Президент Қасим-Жомарт Тоқаев Бирлашган Миллатлар Ташкилотининг Иқлим ўзгариши бўйича доиравий конвенцияси иштирокчиларининг 29-конференцияси доирасида ўтказилаётган иқлим бўйича жаҳон етакчиларининг саммитида иштирок этди. Ялпи мажлис очилишидан кейинги биринчи сўз Қозоғистон Президентига берилди.
Аввало, Қасим-Жомарт Тоқаев Қозоғистон глобал иқлим кун тартибини қўллаб-қувватлашини тасдиқлади ва иқлим ўзгаришига қарши курашда халқаро ҳамкорлик муҳимлигини қайд этди. Давлат раҳбари Қозоғистон ўз олдига 2060 йилгача углерод нейтраллигига эришишни юксак мақсад қилиб қўйганини эслатди.
Қасим-Жомарт Тоқаев бу вазифани бажаришда реал молиялаштириш манбалари ва замонавий технологияларга таянишини айтди. Шунингдек, у “Янги жамоавий иқлимни молиялаштириш мақсади” (NCQG) доирасида табиий ўзгаришларга мойил бўлган ҳудудларга, айниқса денгизга чиқиш имкони бўлмаган ривожланаётган мамлакатларга алоҳида эътибор қаратиш зарурлигини таъкидлади.
"Дунёдаги зарарли чиқиндиларнинг бор-йўғи 1 фоизи Марказий Осиё мамлакатларига тўғри келади. Шунга қарамай, бу минтақа кўплаб иқлим таҳдидларига дучор бўлмоқда. Табиатдаги ўзгаришларга жавоб бериш чоралари самарадорлигини ошириш учун биз сунъий интеллект, сунъий йўлдошнинг илғор технологияларидан, хавф-хатарлар, сув ва ер ресурслари ҳақида эрта огоҳлантириш учун биз самаралироқ бошқарадиган бошқа рақамли воситалардан фаол фойдаланишимиз керак”, – деди Президент.
