Дунёда иссиқ тўлқинлари кучаймоқда
ASTANA. Kazinform – Сўнгги 30 йил ичида дунё бўйлаб ўта иссиқ кунлар сони кескин ошган. Бу эса ҳарорат ва намлик даражасининг ошиб боришига қарши шошилинч чоралар кўришни талаб этади, деб ёзади ТАСС агентлиги.
Бундай хулосага Австралиялик олимлар келган бўлиб, улар дунёнинг 18 мамлакатидан ҳамкасблари билан биргаликда ўтказган тадқиқот натижаларини “Атроф-муҳит ва ресурслар бўйича йиллик таҳлил” илмий нашрида эълон қилган.
Ҳисоботда қайд этилишича, 1990-2006 йиллар оралиғида йилига ўртача 12 та иссиқ тўлқинли кунлар кузатилган бўлса, 2007-2023 йилларда бу кўрсаткич 19,3 кунга етган. Энг катта ўсиш Африка, Яқин Шарқ ва Осиёнинг айрим ҳудудларида қайд этилган.
Бу сафарги тадқиқотда олимлар экстремал иссиқ хавфини аниқ баҳолаш учун илк бор фақат ҳаво ҳароратига эмас, балки ҳаводаги намлик миқдори, қуёш радиацияси интенсивлиги, шамол тезлиги ва йўналишига ҳам эътибор қаратган.
Тадқиқот натижаларига кўра, бундай иссиқ тўлқинлар инсон саломатлигига тўғридан-тўғри таъсир қилиб, қуёш уриши ва юрак-қон томир хасталикларига олиб келиши мумкин. Шунингдек, уларнинг билвосита таъсири сифатида руҳий ҳолатнинг ёмонлашиши ва ҳомиладор аёллар учун хавфлар ҳам қайд этилган.
Олимлар иссиқ кунлар сонининг ортиши сабабли соғлиқ ва иқтисодиётга келадиган зарарни камайтиришга қаратилган комплекс ёндашувни таклиф этмоқда. Бу ёндашувга маълумот ва ресурслар алмашуви бўйича халқаро ҳамкорлик, миллий мослашув ва олдини олиш стратегияларини ишлаб чиқиш, давлат идоралари ва илмий ташкилотлар ўртасида ҳамкорликни кучайтириш, маҳаллий жамоаларни хавфларни камайтириш тадбирларига жалб этиш, аҳоли хабардорлигини ошириш ва шахсий ҳимоя чораларини кўриш каби тадбирлар киради.
