Дунёда холера тарқалиши мумкин: Қозоғистон янги эпидемияга тайёрми

ASTANА. Кazinform – Қозоғистон Республикаси Соғлиқни сақлаш вазирлигининг Юқумли касалликларга қарши кураш бошқармаси бошлиғи Роза Қожапова дунёда холера эпидемияси хавфи ва мамлакатнинг янги эпидемияга тайёрлиги ҳақида гапирди, деб хабар беради Kazinform мухбири.

Унга кўра, вазирлик томонидан ичимлик суви сифати ва очиқ сув ҳавзаларидаги сув мунтазам текширилади.

«Жаҳон соғлиқни сақлаш ташкилоти дунёда холеранинг тарқалиш хавфини жуда юқори деб атади. Мамлакатимиздаги ҳамма қишлоқлар ҳам марказий сув билан таъминланмаганини ҳисобга олсак, шундай хавф борми?», – деб сўради журналист Марказий коммуникациялар хизматида бўлиб ўтган матбуот анжуманида.

Юқумли касалликлар бўлими бошлиғи жорий йилда бир қатор мамлакатларда, асосан Африка ва Сурияда холера кўпайганини тасдиқлади.

«Бироқ, сўнгги 10 йил давомида Қозоғистон ҳудудида холера касаллиги қайд этилмаган. Холера - одамдан одамга тўғридан-тўғри сув орқали юқадиган касаллик. Мунтазам равишда ҳам ичимлик суви, ҳам очиқ сув ҳавзаларидаги сув сифати назорат қилинади. Очиқ сув ҳавзаларида патогенлар, шу жумладан холера борлиги мунтазам текширилади. Бугунги кунда ушбу тадқиқотлар натижаларига кўра, мамлакатимизда холера касаллигининг тарқалиш хавфи йўқ», - деб тушунтирди Роза Қожапова.

Шунга қарамай, бир қатор давлатларда холера касаллиги қайд этилгани инобатга олиниб, мамлакатга кириб келаётган фуқаролар давлат чегарасида назорат қилиниб, текширилмоқда.

«Агар бу одамлар орасида касаллик аниқланса, улар дарҳол изоляция қилинади. Тиббий ёрдамга мурожаат қилганларнинг касаллик тарихига аниқлик киритилади. Агар одамлар чет элдан келиб, шунга ўхшаш касалликка чалинган бўлса, улар изоляция қилинади ва карантинга олинади. Бироқ очиқ сув ҳавзаларини ўрганиш натижаларига кўра, бугунги кунда вазият тинч», — дея қўшимча қилди шифокор.

Муаллиф: Айжан Серикжанқизи