Дрон, видеокамера, лифт, тиббий асбоб-ускуналар – Туркистонда қандай корхоналар очилади
TÚRKІSTAN. KAZINFORM — Туркистон вилоятида хорижий капитал иштирокида қиймати 910 миллион АҚШ долларига тенг 6 та инвестиция лойиҳаси ишга туширилди. Бу ҳақда вилоят ҳокими Дархан Сатибалди ижтимоий-иқтисодий ривожланиш масалаларига бағишланган ҳисобот йиғилишида маълум қилди.
Ҳокимнинг сўзларига кўра, “Кичик саноат парки” лойиҳаси илк бор Туркистон вилоятида 100 гектар майдонда очилган. Лойиҳа доирасида 308 миллиард тенге сармоя киритилиб, 150 дан ортиқ саноат бинолари қурилади. Олти мингга яқин янги иш ўрни яратилади, бюджетга ҳар йили миллиардлаб солиқлар тушади.
“Бугунги кунда 8 та ишлаб чиқариш ишга туширилди. Томчилаб суғориш тизимлари ишлаб чиқарувчи корхоналар очилди. Мебель, музлатгичлар, қурилиш материаллари ишлаб чиқарадиган заводлар ишга туширилди. Илгари фақат хориждан келтириладиган сувни тежовчи технологиялар бугун Туркистонда ишлаб чиқарилмоқда. Саноат паркида очилган корхоналарнинг сув тежовчи технологиялари бошқа ҳудудларга ҳам сотилмоқда”, – деди Д. Сатибалди Марказий коммуникациялар хизматида бўлиб ўтган брифингда.
Шунингдек, минтақага сармоя жалб этиш ва тажриба алмашиш мақсадида туркистонлик ишбилармонларнинг Хитой, Россия, Австралия, Ўзбекистон, Қатар ва Жанубий Кореяга ташрифи ташкил этилиб, йирик компаниялар билан муҳим музокаралар олиб борилди.
Натижада хорижий капитал иштирокида 910 миллион АҚШ долларини ташкил этган 6 та инвестиция лойиҳаси ишга туширилди. Жумладан: саноат иссиқхона мажмуаси (Келес тумани, «Ecoculture Eurasia» МЧЖ II босқич); Алюминий маҳсулотлари ишлаб чиқариш (Ордабаси тумани, «Central Asia Aluminium»); Саноат музлатгичларини ишлаб чиқариш (Сауран тумани, «UBC Group»); Каустик сода, ПВХ, кальций карбид, оҳак-цемент ишлаб чиқариш заводи (Тулкибас тумани, “Састўбе инновация комплекси” МЧЖ); Фосфорит рудаларини қайта ишлаш заводи (Созақ тумани, “Созақ фосфат” МЧЖ) ва нефтни қайта ишлаш заводи (Ордабаси тумани, «Standard Petrolleum» МЧЖ) очилади.
“Бундан ташқари, октябрь ойида Туркистон шаҳрига 127 та хорижий компанияни таклиф қилдик ва 301 миллиард тенгелик 35 та меморандум имзоладик. Ушбу шартнома орқали дрон, видеокамера, тиббий асбоб-ускуналар, маиший техника ишлаб чиқарувчи корхоналар очилиши бошланди. Туркистон заводлари мамлакатимизни турли маҳсулотлар билан таъминлаб, экспорт қилмоқда”, – дейди Дархан Сатибалди.
Шунингдек, саноат зоналарида маиший техника, ўсимлик мойи, газ қурилмалари, лифт йиғиш, ҳарбий чодирлар, санитария-техник воситалар, сендвич-панеллар ва ичимликлар ишлаб чиқарадиган заводлар очилади.
