Дональд Трампнинг "учар саройи" бўлиши мумкин
ASTANA. Kazinform – Оқ уй Қатар шоҳона оиласи билан люкс даражадаги Boeing 747 самолётини АҚШга президент борти (Air Force One) сифатида фойдаланиш учун вақтинча бериш масаласини муҳокама қилмоқда, деб ёзади АҚШ оммавий ахборот воситалари.
Қатар бу самолёт ҳадя қилинмайди, балки “вақтинча фойдаланишга” берилиши мумкинлигини айтмоқда.
CBS News маълумотига кўра, ушбу самолёт Дональд Трамп ваколати тугагандан кейин унинг президентлик кутубхонасига ҳадя сифатида берилмоқчи.
Бу хабар Трампнинг Оқ уйга қайтганидан сўнг Қатарга режалаштирилган биринчи хорижий сафари арафасида пайдо бўлди.
Қатар ҳукумати матбуот котиби Али Ал-Ансари маълум қилишича, Қатар Мудофаа вазирлиги ва Пентагон ўртасида музокаралар олиб борилмоқда.
«Масала тегишли юридик идоралар томонидан кўриб чиқилмоқда, ҳали қарор қабул қилингани йўқ», – деди у.
Манбаларга кўра, самолёт президент томонидан дарҳол фойдаланиш учун тайёр бўлмайди — уни қайта жиҳозлаш ва хавфсизлик тизимлари билан таъминлаш керак бўлади.
ABC News ёзишича, Қатар бериши мумкин бўлган Boeing 747-8 модели модернизациядан сўнг ҳақиқий “учувчи сарой”га айланган. Самолётнинг қиймати 400 миллион долларгача етиши мумкин.
«Хорижий давлатлар томонидан тақдим этилган ҳар қандай совға амалдаги қонунларга тўлиқ риоя қилган ҳолда қабул қилинади ва Трамп маъмурияти тўлиқ ошкораликка интилади», — деди Оқ уй матбуот котиби Кэролайн Ливетт.
Ҳозирда АҚШ президенти Boeing 747-200B моделдаги иккита Air Force One самолётидан фойдаланмоқда — улар 1990 йиллар бошидан хизмат қилмоқда.
Boeing компанияси Оқ уйга янги самолётлар етказиб бериш бўйича шартнома имзолаган, аммо Трамп 2025 йил бошида компания ишни кечиктираётганидан шикоят қилган. Трамп маъмурияти ўзининг илк президентлик даврида 747-8 моделдаги икки самолётни олиш бўйича музокаралар олиб борган.
Бу самолётлар 2027 ёки 2028 йилгача тайёр бўлмаслиги айтилган.
«Мен Boeing ишидан мамнун эмасман. Уларга Air Force Oneни тайёрлаш учун жуда кўп вақт керак бўлмоқда. Бу шартномани анча аввал берганмиз. Биз бошқа самолётни сотиб олишимиз ёки қабул қилишимиз мумкин», – деган эди Трамп февраль ойида.
Аввалроқ Қатар 2018 йилда Туркияга ҳам самолёт совға қилган эди.
Самолёт тақдим этилиши ҳақидаги хабарлар демократ қонун чиқарувчилар томонидан танқидга учради. Улар бу ҳолатни Дональд Трамп томонидан президентлик лавозимидан шахсий манфаатлари учун фойдаланишнинг яна бир мисоли сифатида баҳоладилар.
