Давлат раҳбари Қасим-Жомарт Тоқаев қозоғистонликларни Конституция куни билан табриклади
ASTANA. Kazinform - Давлат раҳбари Қасим-Жомарт Тоқаев Қозоғистон халқини Конституция куни билан табриклади. Бу ҳақда Kazinform агентлиги Ақорда матбуот хизматига таяниб хабар беради.
- Ҳурматли ватандошлар! Барчангизни Конституция куни билан табриклайман!
Конституция давлатчилигимизнинг мустаҳкам пойдевори, мамлакатимизни изчил ва барқарор ривожлантиришнинг мустаҳкам кафолатидир.
Давлат ва жамият ҳаётининг асосларини белгилаб берувчи Конституцияда фуқароларнинг манфаатлари, ҳуқуқ ва эркинликларига алоҳида эътибор қаратилган. Шу боис Қозоғистонда амалга оширилаётган барча кенг кўламли ўзгаришлардан мақсад халқ фаровонлигини оширишдан иборат.
2022 йилдаги конституциявий ислоҳот натижасида ҳар томонлама демократлаштириш жараёни бошланди, сиёсий тизимни модернизация қилиш учун шарт-шароит яратилди. Ҳуқуқни муҳофаза қилувчи идоралар ва Инсон ҳуқуқлари бўйича вакилнинг мақоми кўтарилди. Конституциявий суд ҳам ташкил этилди. Бу институт эндиликда мамлакатда қонун устуворлигини ўрнатишга максимал даражада таъсир кўрсатади.
Адолатли ва фаровон жамият таянчи бўлган Конституциянинг қонун ва тартибни таъминлашдаги ўрни мустаҳкамланди.
Фуқаролар асосий қонунимизни ҳурмат қилиб, унинг талабларини сидқидилдан бажараётгани чинакам ватанпарварлик ва юксак масъулиятнинг ёрқин ифодасидир. Конституцияда мустаҳкамланган қадриятлардан келиб чиқиб, барчага тенг имкониятлар берадиган адолатли Қозоғистонни биргаликда барпо этишимизга қатъий ишонаман.
Ҳар бир оилага қут-барака ва муваффақиятлар тилайман!
