Данияда пенсия ёши оширилади
ASTANA. Kazinform - Дания парламенти пенсия ёшини босқичма-босқич 70 ёшга қадар оширишни назарда тутувчи қонун лойиҳасини тасдиқлади, деб хабар беради Gazeta.ru.
Унга кўра, ўзгаришлар босқичма-босқич амалга оширилади: 2030 йилга бориб данияликлар 68 ёшдан, 2035 йилда — 69 ёшдан, 2040 йилда эса 70 ёшдан пенсияга чиқишлари мумкин. Ҳозирда мамлакатда 67 ёшдан пенсияга чиқилади.
Мазкур ташаббусни Фолкетинг (парламент) депутатларининг аксарияти қўллаб-қувватлаган — йиғилишда иштирок этганларнинг 81 нафари. Шунингдек, 21 нафар парламентарий қонун лойиҳасига қарши чиққан.
Ислоҳотни қўллаб-қувватловчилар буни ўзгарувчан демографик вазиятга мослашиш зарурати билан изоҳламоқда — мамлакатда умр кўриш давомийлиги барқарор ўсиб боряпти. Бироқ ҳамма ҳам бу янгиликни хурсандчилик билан қабул қилгани йўқ: касаба уюшмалари вакиллари аллақачон хавотир билдириб, ҳар ким ҳам бундай ёшгача самарали ишлай олмаслигини таъкидлаган.
Шунга қарамай, Дания расмийлари янги ёндашув келажакда пенсия тизимининг барқарорлигини таъминлашга хизмат қилишини айтмоқда.
Эслатиб ўтамиз, аввалроқ Дания АҚШ вице-президентининг Гренландияга ташрифига муносабат билдиргани ҳақида хабар берган эдик.
