Дамашқда черковдаги портлаш оқибатида 20 киши ҳалок бўлди

ASTANA. Kazinform — Дамашқнинг Дувейла ҳудудидаги Мар Элиас черковида содир этилган худкушлик ҳужумида камида 20 киши ҳалок бўлди, 50 дан ортиқ киши жароҳатланди, деб хабар беради Каzinform агентлиги BBCга таяниб.

Сурия Ички ишлар вазирлиги ҳужумчи “Исломий давлат” аъзоси (Қозоғистонда тақиқланган – муҳаррир эслатмаси) эканини маълум қилди.

У черковга кириб, ўт очган ва кейин портловчи моддалар бор жилетини портлатиб юборган.

Анонимлик шарти билан гапирган хавфсизлик манбасининг Reuters агентлигига айтишича, ҳужумда икки эркак, жумладан, ўзини портлатган киши ҳам иштирок этган.

Декабрь ойида Асад ҳокимиятдан ағдарилганидан бери Суриядаги черковларга бир неча марта ҳужум уюштиришга уринишлар ортида ИШИД турган, бироқ бу биринчи муваффақиятли уринишдир, деди Reuters агентлигига бошқа бир хавфсизлик манбаси.

Телевизион тасвирларда черков ичида вайронагарчилик белгилари, жумладан, қонли пол ва синган ўриндиқлар акс этган.

— Биз Дамашқдаги Мар Элиас грек православ черковига уюштирилган даҳшатли терактни сўзсиз қоралаймиз. Биз Сурия ўтиш даври ҳукуматидан айбдорларни жавобгарликка тортиш учун зудлик билан чора кўришни ҳамда насроний жамоалари ва барча диний гуруҳлар хавфсизлигини таъминлаш, уларга қўрқувсиз яшаш имконини берувчи чоралар кўришни талаб қиламиз, - дейилади Греция Ташқи ишлар вазирлиги баёнотида.

Эслатиб ўтамиз, аввалроқ 9 июнь куни Исроил ҳаво кучлари Сурияга зарба бергани ҳақида ёзган эдик.